Миср Ўзбекистон учун стратегик IT-экспорт бозорларидан бирига айланиши мумкин

Ўзбекистоннинг Мисрдаги элчихонасида IT-Park ишчи гуруҳи билан учрашув ўтказилиб, Қоҳирага 7–12 декабр кунлари амалий сафар натижалари муҳокама қилинди. Томонлар яқин икки йил ичида Миср IT-экспортнинг энг стратегик ва тез ривожланаётган бозорларидан бирига айланиши мумкинлигини қайд этди.

Фото: “Дунё” АА

“Дунё” АА хабарига кўра, Ўзбекистоннинг Мисрдаги элчихонасида Рақамли технологиялар вазирлиги ҳузуридаги Дастурий маҳсулотлар ва ахборот технологиялари технологик парки дирекцияси — IT-Parkнинг ишчи гуруҳи аъзолари билан учрашув бўлиб ўтди.

Учрашувда ишчи гуруҳнинг жорий йил 7–12 декабр кунлари Қоҳирага амалий сафари давомида эришилган келишувлар ҳамда ҳамкорликни кенгайтириш бўйича режалар муҳокама қилинган.

Таъкидланишича, IT-Parkнинг Мисрдаги турдош компаниялар билан ҳамкорлиги ҳозирча бошланғич босқичда. Айни пайтда IT-Parkда Мисрнинг ягона резиденти сифатида NEN FOR INFORMATION TECH компанияси фаолият юритмоқда. Корхона арабча RTL йўналишлари учун eExam лицензияси ва “AI мониторинг” хизматларини кўрсатиб, 15 нафар ходимни иш билан таъминлаган.

Қоҳира сафари доирасида F6Ventures, EgyRobo, V.Connct, ACT International, Plug and Play Egypt каби 10 дан зиёд етакчи компаниялар билан икки томонлама музокаралар ўтказилиб, ўзаро манфаатли ҳамкорликни фаоллаштиришга қаратилган аниқ режалар белгилаб олинган.

Маълум қилинишича, ҳозирда Мисрдан 10 та янги компаниянинг Ўзбекистонда фаолият бошлаши, 250 та янги иш ўрни яратилиши ва йиллик IT ҳамда BPO экспорт ҳажмини 2 миллион долларга етказиш бўйича чоралар ишлаб чиқилмоқда. Шу боис, яқин 2 йил ичида Миср Ўзбекистон учун IT-экспортнинг стратегик ва тез ривожланаётган бозорларидан бирига айланиши мумкинлиги тахмин қилинмоқда.

Учрашув якунида келгусида Ўзбекистон ва Миср ўртасида АКТ соҳасидаги алоқаларни ривожлантириш ҳамда қўллаб-қувватлаш бўйича ҳамкорликни давом эттиришга келишиб олинди.

Тайёрлаган: Отабек Матназаров

#Миср #IT-хизмат