Австриянинг Вена шаҳридаги Амалий санъат музейидан Мисрнинг собиқ қироличаси Назли Сабрига тегишли бўлган 673 та бриллиантли тарихий маржон ўғирлаб кетилди.
Ўғрилик 27 август куни, кундузи соат тахминан 14:00 ларда, музейнинг иш вақти пайтида юз берган. Икки нафар номаълум эркак кўргазмага оддий ташриф буюрувчилар каби чипта сотиб билан киришган. Улар юзларига ниқоб ҳам тақмаган.
Ўғрилар француз заргарлик уйи «Van Cleef & Arpels» кўргазмаси жойлашган залга ўтиб, болға ёрдамида экспонат сақланаётган шиша витринани уриб синдиришган. Жиноятчилардан бирининг ёнида ўқотар қурол ҳам бўлгани тахмин қилиняпти, шу сабабли музей хавфсизлик ходимлари уларга қаршилик кўрсата олишмаган. Ўғрилар қимматбаҳо тақинчоқни олиб, номаълум томонга қочиб кетишган. Ҳодиса вақтида залда бўлган бошқа ташриф буюрувчиларга зарар етмаган.
Маржон платина металидан ишланган бўлиб, унга умумий оғирлиги 200 каратдан ортиқ бўлган 673 та бриллиант ўрнатилган. Ушбу нодир санъат асари 1939 йилда Миср қироличаси Назли учун тайёрланган. Қиролича уни қизининг Эрон тахт вориси, кейинчалик эса мамлакат шоҳи бўлган Муҳаммад Ризо Паҳлавий билан тўйида тақишни режалаштирган.
Кейинчалик қиролича молиявий қийинчиликлар туфайли тақинчоқни сотиб юборган. 2015 йилда эса «Van Cleef & Arpels» заргарлик уйи уни Нью-Йоркдаги Sotheby's аукционидан 4,3 млн долларга ўз архив коллекцияси учун қайта сотиб олганди.
Ҳозирда Австрия полицияси ва Interpol ўғриларни топиш бўйича кенг кўламли операция олиб боряпти.
