Трамп 80 га кирмоқда. 48-бўлиш учун зимдан кураш бошланган

Доналд Трамп АҚШ президентлигига қайтганига бир йил бўлди. 80 ёшга қараб кетган Трамп Американи яна уч йил бошқаради. 2029 йил 20 январ куни, ўша кунгача эсон-омон етиб борса, тантанали тарзда иккинчи ва охирги президентлик муддатини якунлайди. 2028 йил кузда аллақачон кейинги президент аниқланган бўлади. Шу боис америкаликлар ҳозирдан кейинги президент ким бўлади, деган саволга жавоб изламоқда.

{Yii::t(}

Ўтказиб юбориш 6s

Ўтказиб юбориш

Вэнс – «сиёсий ворис»ми?

Америкада аллақачон президентлик учун кураш бошланиб кетган. Ўзи у ерда шунақа, бир президент сайланганидан кўп ўтмай кейинги сайлов ҳақида ўйлай бошлашади. Аввал икки партия ичида якка номзод бўлиш учун кураш кечади, праймеризлар худди АПЛдаги Boxing Day каби кескин ўтади. Партиялар якка номзодни аниқлагач, асосий сайлов кампанияси старт олади. Ҳамма бир-бирига компромат излайди, номзодларнинг боғчада нима еб-ичганигача титкилаб чиқишади. Орада Конгресс, Вакиллар палатаси сайлови ҳам бор: ҳа, америкаликлар сайловдан сайловгача яшайди. Ҳали маҳаллий губернаторлик, мэрлик ва яна ўнлаб лавозимлар учун сайловларни санамадим. Америкада бир кун газета ўқимасангиз, сиёсатдан орқада қолиб кетасиз. Ана шунақа, америкалик бўлиш ҳам осон эмас.

Хуллас, ҳали Трамп иккинчи муддатининг бир йиллигини тугатиб улгурмай Оқ уйдаги чиновниклар орасида зимдан кураш бошланган. Жей Ди Вэнс ўзини Трампнинг сиёсий вориси деб билади, Марко Рубио ҳам бир вақтлар президентлик орзусида эди, Оқ уйда салкам хўжайинга айланиб кейин ҳайдалиб кетишга ҳам улгурган Илон Маскни ҳам эътибордан четда қолдирмаслик керак. Демократлар ҳам аста-секин уйғона бошлаган, партия аъзолари кучли нокаутдан кейин ўзларига янги, ёш, самолёт трапига йиқилмай чиқадиган, дебатда забони бурро лидер излаяпти.

Лекин АҚШнинг 48-президенти бўлишни ҳаммадан кўп вице-президент Жей Ди Вэнс истамоқда. Ўзи шундоғам вице-президентларда кейинги сайловларда қолганлардан кўпроқ имкон бўлади. Масалан, Жо Байден Барака Обама вақтида, Камала Ҳаррис Жо Байден вақтида вице-президент эди. Сайловчилар фақат президентга эмас, у танлаган вице-президентга ҳам овоз беришади аслида.

Лекин Жей Ди Вэнс ҳалитдан сайлов кампаниясини бошлаб юборган кўринади. Чарли Кирк деган Трампнинг тарафдори отиб ўлдирилгани эсингизда бўлса керак. Яқинда ана шу одам хотирасига тадбир ўтказилди. Амалда республикачилар партияси тарғиботига айланиб кетган тадбирда Трампнинг ўғли ва вице-президент Жей Ди Вэнс ҳам қатнашди. Вэнс тадбир охирида сўзга чиқди, худди тарғибот кампанияларида бўладигани каби. Етмаганига марҳум Чарли Киркнинг беваси Эрика Кирк «Жей Ди Вэнс АҚШнинг 48-президенти бўлишига эришамиз», деди. Беванинг бу гапини олқишлар билан қарши олишди.

Ана шунақа гаплар грин-картани бекор қилган Трампнинг Америкасида. Популист Вэнс ҳали президентликка номзод бўлиши ҳақида гапиргани йўқ, чунки ҳозирдан бу ҳақда гапириши унинг хўжайинига ёқмаслиги аниқ. Лекин Трамп ҳам Вэнс ўзидан кейин Оқ уй раҳбари бўлиб қолишини исташига бир неча марта ишора қилган. Ҳали демократларда яққол номзод йўқлиги ҳисобга олинса, Вэнснинг имкониятлари яхши.

Яна бир гап, Жей Ди Вэнс президентликка сайланса, Оқ уйга борадиган бошқа давлат президентларига осон бўлмайди. Улар сўзларини раҳмат айтиш билан бошлаб, раҳмат айтиш билан тугатишига тўғри келади. Бўлмаса, 28 феврал куни Оқ уйда меҳмон бўлган бир президент ҳолига тушмасликларига ҳеч ким кафолат бермайди...

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.