Туркия капитали иштирокидаги корхоналарнинг асосий қисми Тошкент ҳиссасига тўғри келди

Миллий статистика қўмитаси маълумотларига кўра, 2025 йил 1 декабр ҳолатига Ўзбекистонда Туркия капитали иштирокидаги корхоналар сони 2 109 тани ташкил этган.

Қайд этилишича, ушбу корхоналарнинг 487 таси қўшма, 1 622 таси эса хорижий корхона ҳисобланади.

Ҳудудлар кесимида энг катта улуш Тошкент шаҳри ҳиссасига тўғри келиб, бу ерда 1 292 та Туркия капитали иштирокидаги корхона фаолият юритмоқда. Тошкент вилоятида эса улар сони 288 тани ташкил этган.

Қолган ҳудудларда кўрсаткичлар қуйидагича қайд этилган: Самарқанд — 111 та, Фарғона — 70 та, Андижон — 57 та, Жиззах — 55 та, Бухоро — 44 та, Наманган — 42 та, Хоразм — 31 та, Навоий — 30 та, Сурхондарё — 30 та, Сирдарё — 22 та, Қашқадарё — 19 та, Қорақалпоғистон — 18 та.

Умуман олганда, Туркия капитали иштирокидаги корхоналар географиясида Тошкент шаҳри ва Тошкент вилояти етакчи ўринни эгалламоқда, бу эса турк сармояси, асосан, йирик бозор ва инфратузилма имкониятлари юқори бўлган ҳудудларда жамланаётганини кўрсатади.