Ушаков: Трамп Путин резиденциясига “ҳужум” ҳақидаги гаплардан шокда

Оқ уй матбуот котиби Кэролайн Ливитт 29 декабр, душанба куни X ижтимоий тармоғида АҚШ ва Россия президентлари Доналд Трамп ва Владимир Путин Украинадаги урушни тўхтатиш бўйича музокаралар мавзусида “ижобий” телефон суҳбати ўтказганини билдирди.

Икки раҳбар суҳбатини РФ президенти ёрдамчиси Юрий Ушаков ҳам тасдиқлади. Унинг айтишича, Трамп маслаҳатчилари билан бирга 28 декабр куни АҚШ президентининг Мар-а-Лаго хусусий қароргоҳида (Флорида штати) Украина президенти Володимир Зеленский билан ўтказилган музокаралар якунлари ҳақида Путинни хабардор қилган.

Ушаков сўзларига кўра, Путин эса ўз навбатида Трампга Новгород вилоятидаги давлат резиденциясига Украина гўёки дронлар билан ҳужум қилишга урингани ҳақида айтган. Бу ҳақда аввалроқ РФ ташқи ишлар вазири Сергей Лавров баёнот берган эди. Путин ёрдамчиси “ҳужум” Мар-а-Лаго музокараларидан “кейин” амалга оширилганини қайд этган. Ушаковнинг айтишича, Россия раҳбари Трампга бу “ҳужум” жавобсиз қолмаслигини, шу вазият фонида Украинадаги урушни тўхтатиш бўйича музокараларда РФ позицияси қайта кўриб чиқилишини билдирган.

Путин ёрдамчисига кўра, Трамп суҳбатда Путин резиденциясига дрон (учувчисиз аппарат)лар билан “ҳужум” қилингани ҳақидаги хабардан шокда қолгани ва ғазабланганини айтган. Шунингдек, даъво қилинишича, “ҳужумга уриниш” муҳокамасида АҚШ президенти “Оқ уй Киевга ‘Томагавк’ бермаган”, деган.

Оқ уй Доналд Трампнинг бу гапларини ҳозирча расман тасдиқламаган.

Лавров 29 декабр кечқурун Украина Новгород вилоятидаги Россия президенти резиденциясига 91 та дрон билан ҳужум қилишга уринганини айтган. Унинг сўзларига кўра, барча дронлар йўқ қилинган. У “ҳужум”ни инобатга олган ҳолда “РФнинг музокара позицияси қайта кўриб чиқилади”, деб таъкидлаган, бироқ Москва “АҚШ билан музокара жараёнидан чиқиш ниятида эмас”, деган.

Зеленский Лавровнинг бу баёнотини ёлғон деб атаган ва Россия Киевдаги ҳукумат кварталига зарба беришга тайёрланаётгани билан изоҳлаган. У шунингдек, РФ ТИВ раҳбарининг гапларини Трамп билан кечаги музокаралар билан боғлаган: “Тушунарли: руслар учун Америка билан бизда жанжал бўлмаса — аксинча, илгарилаш бўлса — бу мағлубият. Чунки улар бу уруш тугашини истамайди”, — деган Зеленский.

Украина президенти фикрича, Москва бундай баёнотлар билан Киев ва Вашингтон ўртасидаги тинчлик музокараларида эришилган илгарилашни издан чиқаришга уринаётган бўлиши мумкин. У Трампни “Россия таҳдидларига муносиб жавоб бериш”га чақирган.

Шу куни Зеленский ва АҚШ президентининг махсус вакили Стивен Уиткофф ўртасида ҳам телефон суҳбати бўлиб ўтганини Украина МХМК котиби Рустем Умеров X тармоғида ёзган.

“Асосий нуқта — кейинги алоқалар ва навбатдаги қадамларни мувофиқлаштириш. Иш жуда шиддатли ва мазмунли: биз деярли ҳар куни маслаҳатлашувларни давом эттиряпмиз ва ҳужжатлар бандлари устида ишлаяпмиз”, — деб ёзди у. Умеров “Европадаги миллий хавфсизлик маслаҳатчилари билан доимий алоқа” ва “яқин вақтда навбатдаги учрашувлар” бўйича келишувлар борлигини ҳам қайд этган.