Берлинда Мерцнинг украиналик эркаклар ҳақидаги сўзларига изоҳ берилди

Германия Украинадан ёш эркакларнинг оммавий равишда чиқиб кетиши сабаб хавотир билдираётган ягона мамлакат эмас, деди Германия федерал ҳукумати расмий вакили Штефан Корнелиус DW’нинг парламент мухбири саволига жавоб бериб. Бу 7 январ, чоршанба куни бўлиб ўтган матбуот анжуманида айтилди. Савол Корнелиусга ГФР канцлери Фридрих Мерцнинг ушбу жараённи тўхтатиш зарурлиги ҳақидаги баёноти билан боғлиқ ҳолда берилган.

“Менимча, бу ҳодиса Европа бўйлаб ҳамма ерда кузатиляпти. Унинг сиёсий ўлчови бор, бу эса федерал ҳукуматга ўз позициясини билдириш ва хавотирини ифода этиш учун асос беради”, — дея тушунтирди Штефан Корнелиус. У қўшимча қилишича, Украинадан ёш эркакларнинг оммавий чиқиб кетиши борасида хавотирни ушбу мамлакат президенти Володимир Зеленский ҳам билдиряпти. Украинага “давлат бошқаруви ва жамоат тартибини таъминлаш ишларини қўллаб-қувватлай оладиган, раҳбарлик қила оладиган ёшлар керак”, — деди Берлиндаги ҳукумат вакили. У, шунингдек, Германия Украинадан ёш авлоднинг кетиб қолишидан манфаатдор бўлиши мумкин эмаслигини ҳам таъкидлади.

Шу орада ЕИнинг миграция масалалари бўйича комиссари Магнус Бруннер Германия ҳукумати позициясига қўшилишини билдирди. “Биз одамлар Украинага қайтиши ва тикланиш ишларида иштирок этиши учун қўлимиздан келган барча ишни қилишимиз керак. Бу муҳим, шунинг учун мен бу нуқтаи назарни қўллаб-қувватлайман”, — деди Бруннер DW’га интервюда.

Унинг сўзларига кўра, Европа Иттифоқи ҳарбий ҳаракатлар тугагач, украинлар ўз мамлакатига қайтиши учун қўлидан келган барча ишни қиляпти. Бу саъй-ҳаракатларни қўллаб-қувватлаш мақсадида Брюссел махсус элчини тайинлаган — Бруннердан олдин ЕИнинг миграция бўйича комиссари лавозимида бўлган Илва Йоханссонни.

Бундан ташқари, Магнус Бруннер таъкидлашича, ЕИ ҳозирнинг ўзидаёқ 2027 йилда РФнинг Украинага кенг кўламли ҳужуми бошланганидан кейин украинларга берилган вақтинчалик ҳимоя мақоми амал қилишни тўхтатишига тайёргарлик кўриши керак. Унинг айтишича, Брюссел бу ҳақда ЕИга аъзо давлатлар ҳукуматларига тегишли сўров билан аллақачон мурожаат қилган.

Бундан олдин Мерц Париждаги “кўнгиллилар коалицияси” учрашувида Украина президенти ёш украин эркаклари Украина ҳудудида ўз мамлакатига хизмат қилишини кафолатлаши кераклигини айтган. Шу йўл билан уларнинг “Германияга, Полшага ёки Францияга чиқиб кетмаслиги”га эришиш зарур, дея қўшимча қилган федерал канцлер.

Ўз навбатида, Бавария бош вазири, Германия ҳукмрон коалициясига кирувчи Христиан-социал иттифоқ (ХСИ) раҳбари Маркус Зёдер Украина хавфсизлигини таъминлаш учун устувор вазифа сифатида украин ҳарбий хизматчиларини сафарбар қилишга эътибор қаратиш керак, деган фикрни билдирди. Шунингдек, унинг айтишича, шу мақсадда украин қочқинларини ҳам ўз ватанига қайтариш зарур.

“Ёш немис эркаклар Украинага боришига тўғри келмасидан олдин, Германиядан ёш украин эркаклар ўз юртига қайтиши керак. Ёш украин эркаклар ўз мамлакатига бориб, ўз юртини ҳимоя қилиши керак”, — деб ҳисоблайди Зёдер.