Топ-10: ўзбекистонликлар ўқиш учун қайси давлатларга кўпроқ бормоқда?

Миллий статистика қўмитаси маълумотларига кўра, 2025 йилнинг январ–ноябр ойларида жами 27,8 минг нафар Ўзбекистон фуқаролари ўқиш мақсадида чет элга сафар қилган. Бу кўрсаткич ўтган йилнинг мос даврига нисбатан 6,7 минг нафарга ёки 19,3 фоизга камайган.

Қўмита маълумотларига кўра, ўқиш мақсадида хорижга сафар қилаётган ўзбекистонликлар энг кўп қуйидаги давлатларни танлаган:

Ўқиш учун энг кўп сафар қилинган топ-10 давлат:

Россия — 6 235 нафар;
Тожикистон — 5 943 нафар;
Қирғизистон — 4 219 нафар;
Корея — 3 410 нафар;
Туркия — 2 381 нафар;
Хитой — 1 231 нафар;
Қозоғистон — 1 074 нафар;
Буюк Британия — 870 нафар;
Германия — 384 нафар;
АҚШ — 333 нафар.

Мутахассислар фикрича, таълим учун хорижни танлашда географик яқинлик, тил муҳити, таълим нархи, қабул шартлари ва мавжуд грант дастурлари муҳим омил бўлиб қолмоқда. Шунингдек, қўшни давлатлар (Россия, Тожикистон, Қирғизистон, Қозоғистон) юқори ўринларда экани транспорт қулайлиги ва алоқаларнинг яқинлиги билан ҳам изоҳланади.

Айни пайтда, Корея, Туркия, Хитой ва Европа давлатларига қизиқиш ҳам сақланиб қолмоқда. Бу йўналишларда замонавий таълим дастурлари, халқаро дипломлар, технология ва тил ўрганиш имкониятлари талабни ошираётган омиллар сифатида кўрилади.

Маълумот учун, 2025 йил январ–ноябр ойларида ўқиш мақсадида чет элга чиққанлар сони ўтган йилга нисбатан пасайганига қарамай, хорижда таълим олиш йўналишлари турли географияни қамраб олаётгани таълим миграциясида кенг танлов мавжудлигини кўрсатади.

Тайёрлаган: Отабек Матназаров

#статистика #хорижда ўқиш