Китобхонликни ривожлантириш учун грантлар ва таржима харажатлари қопланади

“Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги президент қарори қабул қилиниб, 2026–2030 йилларда аҳолининг китобхонлик даражасини бир киши ҳисобида йилига ўртача 10 та китобга етказиш мақсади белгиланди.

“Ҳуқуқий ахборот” каналида келтирилган маълумотга кўра, қарор билан китобхонликни рағбатлантиришга қаратилган тизимли чора-тадбирлар белгиланган. Хусусан, Ёшлар ишлари агентлиги ҳузурида “Китобхонлик маданиятини ривожлантириш жамғармаси” ташкил этилиши ва унинг васийлик кенгаши таркиби тасдиқланган.

Қарорга мувофиқ, жамғарма маблағлари қуйидаги йўналишларни молиялаштиришга йўналтирилиши кўзда тутилган:

танлов асосида ёш ёзувчиларга грантлар ажратиш, асарларини нашр этиш, шунингдек болалар адабиёти лойиҳаларини қўллаб-қувватлаш;
танлов орқали истеъдодли муаллифларни аниқлаш ва уларга ижод учун шароит яратиш мақсадида 1 йилгача ҳар ой БҲМнинг 50 баравари миқдорида тўлов белгилаш;
энг сара хорижий адабиётларни ўзбек тилига, миллий адабиётларни эса хорижий тилларга таржима қилиш бўйича нашрга тайёрлаш ва чоп этиш харажатларининг 50 фоизи, муаллифлик ҳуқуқи учун харажатларнинг 80 фоизини қоплаш;
васийлик кенгаши аъзоларига ҳар чоракда БҲМнинг 50 бараваригача миқдорда мукофот тўлаш.

Қарор билан белгиланган чоралар аҳоли, айниқса, ёшлар ўртасида китоб мутолаасини кенгайтириш, ижодкорларни қўллаб-қувватлаш ҳамда таржима ва нашр ишларини рағбатлантиришга қаратилган.