Трамп: «Мен диктаторман. Аммо баъзида диктатор ҳам керак»

АҚШ президенти Доналд Трамп Давосдаги Жаҳон иқтисодий форумида қилган нутқида Гренландия устидан назоратни қайтариш ҳақидаги гаплари учун яхши фикрлар олганини маълум қилди.

«Яхши нутқ бўлди. Биз ажойиб фидбеклар олдик. Ишонгим келмаяпти. Биз яхши фидбеклар олдик. Одатда бундай нутқдан кейин „у қўрқинчли диктатор“ дейишади. Ҳа, мен диктаторман. Лекин баъзида диктатор ҳам керак бўлади. Аммо бу ҳолатда улар бундай дейишмади. Ва бу энди соғлом фикр. Барчаси соғлом фикрга асосланган», – деди Трамп 21 январ куни журналистлар қаршисида чиқиш қилар экан.

Trump: "Usually they say, 'he's a horrible dictator-type person.' But sometimes you need a dictator." pic.twitter.com/Mi11DZx0u3

— Aaron Rupar (@atrupar) January 21, 2026

Давосдаги нутқида Доналд Трамп Дания автоном ҳудуди ҳисобланган Гренландияни Шимолий Американинг бир қисми деб атади. У дунёнинг энг катта оролини ташқи ҳужумдан фақат АҚШ ҳимоя қила олишини таъкидлаб, Гренландияга эгалик ҳуқуқини Қўшма Штатларга топширишни талаб қилди.

Форумдаги чиқишидан кейин Трамп НАТО бош котиби Марк Рютте билан учрашув ўтказди, музокаралардан кейин НАТО билан Гренландия масаласидаги келишув жиҳатлари бўйича келишиб олганини айтди.

Доналд Трамп бир йил муқаддам, 2025 йил 21 январда президентликка қайтган кунида ўзини диктатор деб ҳисобламаслигини айтганди. «Мени шундай деб аташларини тасаввур ҳам қила олмайман», – деганди у. Шундан сўнг Трамп Украина президенти Володимир Зеленскийни «диктатор» деб атади, шу билан бирга бу атамани РФ президенти Владимир Путинга нисбатан қўллашдан бош тортди. «Мен бу сўзни ишлатишда енгилтаклик қилмайман», – деганди Трамп 2025 йил февралида.