Чорсу бозоридаги дўконда ёнғин содир бўлди

Тошкент шаҳри Шайхонтоҳур туманидаги Чорсу бозорида дўкон ёнаётгани ҳақида хабар тушган. ФВББга кўра, ёнғин қисқа вақт ичида бартараф этилган, тан-жароҳати олганлар йўқ.

Фото: ФВБ

Тошкент шаҳар Фавқулодда вазиятлар бошқармаси 26 январ куни ижтимоий тармоқларда «Чорсу бозорида ёнғин бўлаётганлиги айтилмоқда» сарлавҳаси остида тарқалган хабарлар юзасидан маълумот берди.

Маълум қилинишича, 26 январ куни соат 16:04 да Шайхонтоҳур тумани, Беруний кўчасида жойлашган Чорсу бозорида дўкон ёнаётгани ҳақида хабар келиб тушган. Қутқарув экипажлари воқеа жойига соат 16:08 да етиб борган.

Хабарга кўра, ёнғин соат 16:20 да қуршаб олинган ва соат 16:25 да тўлиқ ўчирилган. Ёнғин оқибатида тан жароҳати олганлар йўқ.

Қайд этилишича, ёнғин натижасида дўкон ертўласининг тахминан 15 кв метр қисми ёниб зарарланган.