Венесуэла парламенти амнистия тўғрисидаги қонунни бир овоздан қўллаб-қувватлади

Венесуэлада амнистия тўғрисидаги қонун лойиҳаси парламентда биринчи ўқишдан ўтди. Унга кўра, Мадуро ва Чавес ҳукмронлиги даврида сиёсий сабаблар билан судланган фуқаролар озодликка чиқиши мумкин.

Фото: AP

Венесуэлада парламент пайшанба, 5 феврал куни амнистия тўғрисидаги қонунни биринчи ўқишда бир овоздан маъқуллади. Бу қонун қабул қилинса, сиёсий маҳбуслар озодликка чиқиши мумкин. Қонун лойиҳаси матнига кўра, амнистия, хусусан, “терроризм”, “ватанга хиёнат” ва “нафрат қўзғатиш” моддалари бўйича ҳукм қилинганларга ҳам татбиқ этилади.

AFP агентлиги тушунтиришича, айнан шундай айбловлар Венесуэлада ҳокимият тепасида бўлган мамлакат раҳбари Николас Мадуро (у 2026 йил январда АҚШ қўшинларининг ҳарбий амалиёти давомида қўлга олинган), шунингдек унинг ўтмишдоши — Венесуэла президенти Уго Чавес даврида сиёсий маҳбусларга қўйиб келинган.

“Биз кечирим сўраймиз ва биз ҳам кечиришимиз керак”, — дея AFP Венесуэла парламенти раиси Хорхе Родригеснинг сўзларини келтиради.

Оммавий амнистия ҳақида январ ойида Делси Родригес эълон қилган эди. У Николас Мадуро АҚШ армияси томонидан қўлга олингандан кейин Венесуэланинг вақтинчалик президентига айланган. Ушбу амнистиянинг мақсади “зўравонлик ва экстремизм билан қўзғатилган сиёсий тўқнашув натижасида пайдо бўлган яраларни даволаш” бўлиши керак, деб таъкидланади. Шу билан бирга, кечириш қотиллик, наркосавдо ва инсон ҳуқуқларига қарши оғир жиноятлар учун ҳукм қилинганларга татбиқ этилмаслиги аниқлаштирилди.

AFP қайд этишича, Венесуэла давлатининг вақтинчалик раҳбари сифатида Делси Родригес Вашингтон билан яқинлашиш сиёсатини юритишга интилмоқда. Хусусан, Венесуэлада аллақачон юзлаб сиёсий маҳбуслар озод этилган. Бироқ яна бир неча юз киши ҳали ҳам қамоқхоналарда қолмоқда.

Шунингдек, АҚШ талаби билан Венесуэлада мамлакатнинг нефт бозорини хусусий инвесторларга очадиган қонун ҳам қабул қилинди. Шу муносабат билан АҚШ ушбу соҳадаги санкцияларни юмшатишини эълон қилди.

Айни пайтда Венесуэла мухолифат етакчиларидан бири, тинчлик бўйича Нобел мукофоти лауреати Мария Корина Мачадо мамлакатда яқин ўн ой ичида демократик сайловлар ўтказиш мумкин, деган фикрни билдирди. “Менимча, тўққиз-ўн ойдан кейин қўлда овоз бериш билан ҳақиқий шаффоф (сайлов — таҳр.) жараёнини ўтказиш мумкин”, — деди у АҚШдаги Politico онлайн нашрига берган интервюсида.

Мачадо Венесуэлада янги сайловлар ўтказиш эҳтимолий муддатларини АҚШ президенти Доналд Трамп билан муҳокама қилмаганини айтди. Трамп эса январ ойида The New York Times газетасига берган интервюсида АҚШ Венесуэла бошқарувини қанча вақт “кузатиб/назорат қилиб” бориши “фақат вақт ўтиб маълум бўлади”, деган эди.