Стефанчук: Россия музокара жараёнини чўзмоқда

Украина Олий радаси спикери DW’га айтишича, Украина ва АҚШ Москвага урушни якунлаш бўйича келишиш вақти келганини англатиб қўйиши керак. Руслан Стефанчук АҚШ Конгресси Киев учун хавфсизлик кафолатларини ратификация қилиши эҳтимолини ҳам муҳокама қилди.

Фото: AP

Россия Украинага қарши урушни якунлаш бўйича музокараларни чўзмоқда. Бу ҳақда Украина Олий радаси спикери Руслан Стефанчук жума куни, 6 февралда Вашингтонда DW’га берган интервюсида айтди.

«Бу — Россиянинг анъанавий моҳияти. У “Биз ҳеч қандай шартларсиз ҳар қандай нарсага тайёрмиз, лекин, лекин, лекин...” дейди. Улар (россияликлар — таҳр.) бу жараённи чўзмоқда», — деди у. «Биз учун эса муҳимки, украинлар ва америкаликлар биргаликда намоён эта оладиган аниқ, қатъий ҳаракатлар россияликларга бу урушни тугатиш бўйича келишиши кераклигини тушунтирсин», — дея қўшимча қилди Стефанчук ва Украина музокарачилари зарур бўлган барча ишни қилаётганига ишонч билдирди.

5 феврал куни Абу-Дабида Украина, Россия ва АҚШ ўртасида тинчлик йўлида келишувга эришишга қаратилган икки кунлик музокаралар якунланган эди.

Вашингтонга ташрифи чоғида Стефанчук АҚШ Конгрессида Украина учун АҚШ томонидан хавфсизлик кафолатларини ратификация қилиш имкониятини Вакиллар палатаси спикери Майк Жонсон билан муҳокама қилди.

«Бу жуда муҳим: биз кеча спикер Жонсон билан гаплашдик — Украинада Будапешт меморандуми бўйича салбий тажриба бор, бизга мажбурий (ҳуқуқий жиҳатдан боғловчи) хавфсизлик кафолатлари керак, биз уларни ҳам Конгрессда, ҳам Украина Олий радасида ратификация қилишга тайёр бўламиз», — дея таъкидлади у.

Рада спикери Киев учун Жонсоннинг қўллаб-қувватлови муҳимлигини қайд этди. «Биз биринчи марта учрашаётганимиз йўқ. У билан доимий равишда қўнғироқлашамиз, бу масалалар бўйича мувофиқлашамиз. У тўғридан тўғри мендан маълумот олиш имкониятига эга», — деди Руслан Стефанчук.

Украин сиёсатчиси, хусусан, сенаторлар Линдси Грэм (Жанубий Каролина штати, республикачи) ва Ричард Блюментал (Коннектикут штати, демократ) билан Украинага Tomahawk ракеталарини бериш масаласини муҳокама қилган. «Украина тинчликни истайди, шунинг учун биз дипломатик майдонда ҳам ечим вариантларини излаяпмиз», — деди DW суҳбатдоши.

Аввалроқ, 2025 йил ноябр ойида Руслан Стефанчук Киев учун музокаралардаги «қизил чизиқлар» сифатида қуйидагиларни атаган эди: Россия босиб олган ҳудудларни расман тан олиш, Украина мудофаа кучларини чеклаш ва мамлакатнинг келажакдаги иттифоқларига чеклов қўйиш.