Ангренда кўп қаватли бинода ёнғин чиқди

Тошкент вилояти Ангрен шаҳрида 4 қаватли бинода ёнғин чиқди. Ҳодиса оқибатида бир киши ҳалок бўлиб, яна бир киши шифохонага ётқизилган – унинг аҳволи оғир экани айтилмоқда.

Фото: Видеодан кадр

7 феврал куни соат 23:19 да Тошкент вилояти Ангрен шаҳридаги кўп қаватли уйларнинг бирида ёнғин келиб чиқди, деб хабар бермоқда Фавқулодда вазиятлар вазирлиги.

Ёнғин оқибатида бир киши ҳалок бўлди.

Қайд этилишича, Дукент қўрғони «Улуғбек» МФЙда жойлашган 4 қаватли бинолар бирининг том қисми ёнаётгани тўғрисида Тошкент вилояти ФВББга хабар қилинган. Шунга кўра, қутқарув экипажлари соат 23:30 да воқеа жойига етиб бориб, бинодан фуқароларни эвакуация қилган.

Ёнғин соат 23:57 да қуршаб олиниб, соат 00:50 да тўлиқ бартараф этилган. Ҳодиса содир бўлган жойга фавқулодда вазиятлар вазири Азизбек Икромов ҳам етиб борган.

«Дарё» манбаси хабар беришича, ҳодиса оқибатида бир киши жонлантириш бўлимига ётқизилган.