Россия авиакомпаниялари Кубага парвозларни вақтинча тўхтатди

“Россия” авиакомпанияси ва Nordwind 11 феврал, чоршанба куни Кубага парвозларни ёнилғи қуйдириш билан боғлиқ муаммолар туфайли вақтинча тўхтатишини маълум қилди. Баёнотга кўра, “Россия” (у “Аэрофлот” гуруҳига киради) яқин бир неча кун ичида Куба аэропортларидан россиялик сайёҳларни олиб чиқиш учун бир нечта махсус рейсларни амалга оширади. Туроператорлар баҳолашича, ҳозир Кубада тахминан 4000 нафар россиялик бор.

Бундан олдин энергия инқирози сабаб Кубага парвозларни бошқа халқаро авиакомпаниялар ҳам тўхтатган эди. Ой бошида Куба ҳукумати 9 февралдан бошлаб хорижий самолётларни ёнилғи билан таъминлай олмаслигини маълум қилди — бунга АҚШ январ охирида жорий этган нефт блокадаси сабаб бўлди.

АҚШ президенти Доналд Трамп Кубага нефт етказиб бераётган давлатларга қарши қўшимча божлар киритиш билан таҳдид қилди. Оқ уй Куба ҳукумати АҚШ миллий хавфсизлигига таҳдид солмоқда ва “дўст бўлмаган давлатлар” билан ҳамкорлик қилмоқда, деб ҳисоблайди. Трамп шунингдек, унинг фикрича, Венесуэладан нефт етказиб бериш тўхтаганидан кейин Куба “коллапсга яқинлашган ва қулаш остонасида” турганини айтди.

Кўп йиллар давомида Кубага нефтнинг асосий етказиб берувчиси Венесуэла бўлган. Экспорт эса АҚШ 2025 йил декабрда Венесуэлага нисбатан денгиз блокадасини жорий этгани ортидан тўхтаб қолди. Венесуэла нефти юкланган охирги танкер Кубага декабр ўртасида юборилган.

Энергетик инқироз шароитида Ҳаванадаги ҳукумат қатъий тежамкорлик чораларини қабул қилди. Мамлакат ҳукумати поезд ва автобус рейсларининг бир қисмини бекор қилди, давлат муассасаларини эса тўрт кунлик иш ҳафтасига ўтказди. Мактаблар ва университетлар машғулотлар сонини кескин қисқартирди, кўплаб меҳмонхоналар ёпилди.

Reuters агентлиги маълумотларига кўра, Куба керакли ёнилғининг умумий ҳажмидан фақат учдан бир қисмини мустақил ишлаб чиқара олади. Мамлакат ҳукумати самолётлар Куба аэропортларида камида келгуси бир ой давомида ёнилғи қуйдиролмаслигини тахмин қилмоқда.