Зеленский Путинда «кўп вақт қолмагани»ни айтди

Украина президенти Володимир Зеленский Мюнхен конференцияси доирасида журналистларнинг саволларига жавоб қайтарди.

Суҳбат чоғида Зеленский ўзининг 48 ёшида Россиянинг 73 ёшли президенти Владимир Путиндан анча ёш эканини таъкидлади. «Унинг вақти унчалик кўп эмас», дея қўшимча қилган Зеленский.

Суҳбат чоғида Зеленский АҚШ президенти Доналд Трампни Россия-Украина урушини имкон қадар тезроқ ҳал қилиш учун Путинга босим ўтказишга чақирди. У уруш тугаши учун Трамп ишончли хавфсизлик кафолатларини тақдим этиши, Украинани урушдан кейинги тиклаш бўйича келишув тузиши ва Россияга тўғридан тўғри босим ўтказиши кераклигини таъкидлади.

«Путинга қўнғироқ қилинг ва айтинг: „Менга қаранг, сиз шу ерда тўхташингиз керак“. Можарони ҳозироқ музлатиб қўйишимиз керак. Шунда биз етакчилар даражасида уч томонлама форматда учрашамиз. Ва бу урушни қандай тугатишни ҳал қиламиз. Аммо биз буни фақат дипломатик йўл билан амалга оширамиз», – деди Зеленский.

Унинг сўзларига кўра, АҚШ Украинани урушга чек қўйиш учун баъзи масалаларда муросага келишга чақирмоқда. «Биз кўплаб масалаларда ён беришга рози бўлдик. Путин ва унинг дўстлари қамоқда эмас. Бу дунё кўрган энг катта муросадир», – деди Украина президенти.