Тошкентдаги FIFA Series 2026 футбол турнири тақвими эълон қилинди

Ўзбекистон миллий жамоаси Тошкентдаги FIFA Series 2026 турнирида қатнашади. Март ойида бўлиб ўтадиган мусобақада Габон, Тринидад ва Тобаго, шунингдек, Венесуэла ҳам иштирок этади.

Фото: UFA

Тошкент мезбонлик қиладиган FIFA Series 2026 турнири тақвими эълон қилинди. ЎФА хабарига кўра, кичик мусобақа 27-30 март кунлари ўтказилади.

27 март

15:00 Венесуэла – Тринидад ва Тобаго («Пахтакор» стадиони)

19:00 Ўзбекистон – Габон («Бунёдкор» стадиони)

30 март

15:00 Габон – Тринидад ва Тобаго («Пахтакор» стадиони)

19:00 Ўзбекистон – Венесуэла («Бунёдкор» стадиони)

FIFA Series 2026 турнирлари ўртоқлик ўйинлари ўрнини босиши назарда тутилган ва бутун дунё бўйлаб ўтказилади. Эркаклар ўртасидаги баҳсларга Австралия, Озарбойжон, Индонезия, Қозоғистон, Янги Зеландия, Пуэрто-Рико, Руанда ва Ўзбекистон мезбонлик қилади. Аёллар ўртасидаги мусобақалар Бразилия, Кот-д'Ивуар ва Таиландда бўлиб ўтади.

Турнирда иштирок этаётган бешта эркаклар миллий жамоаси - Австралия, Кабо-Верде, Кюрасао, Янги Зеландия ва Ўзбекистон 2026 йилги жаҳон чемпионати иштирокчиси саналади.