Қўшимча функционаллар
-
Тунги кўриниш
Трамп Али Хоминаий ўлимини эълон қилди
У Эрон полицияси ва Ислом инқилоби муҳофизлари корпуси аъзоларини Эрон халқи томонига ўтишга чақирган.
Фото: Getty Images
АҚШ президенти Доналд Трамп Эрон олий раҳнамоси, оятуллоҳ Али Хоминаий ҳалок бўлганини маълум қилди. У бу ҳақда Truth Social ижтимоий тармоғида хабар қолдирган.
«Тарихдаги энг ёвуз одамлардан бири Хоминаий ўлди», – дейилади Трампнинг постида.
Унинг фикрича, Эрон халқи «ўз мамлакатини қайтариб олиш учун катта имконият»га эга бўлган.
«Биз Ислом инқилоби муҳофизлари корпуси, армия ва бошқа хавфсизлик кучлари аъзоларидан кўпчилиги, шунингдек полициячилар ортиқ жанг қилишни хоҳламаётгани ва иммунитетга эга бўлишни хоҳлаётгани ҳақида эшитдик. Мен кеча айтганимдек: „Улар ҳозир иммунитетга эга бўлиши мумкин, кейин эса уларни фақат ўлим кутади!“ Умид қиламанки, Ислом инқилоби муҳофизлари корпуси ва полиция тинчгина Эрон ватанпарварларига қўшилади ҳамда мамлакат муносиб бўлган улуғворликни қайтариш учун бир тану бир жон бўлиб ҳаракат қилишади», – дея ёзган Трамп.
Трамп Эронга зарбалар бир ҳафта ёки «мақсадга эришилгунча – Яқин Шарқда ва охир-оқибат бутун дунёда тинчликка эришиш учун қанча вақт керак бўлса, шунча вақт» давом этишини қўшимча қилган.
Олдинроқ Reuters ва Times of Israel исроиллик расмийларга таяниб, Али Хоминаий Исроилнинг Теҳрон бўйлаб зарбалари оқибатида ҳалок бўлгани ҳақида хабар тарқатганди. Эрон томони бу хабарларни «психологик уруш методи» деб атаганди.
АҚШ ва Исроилнинг Эронга тажовузи
