Трамп: Эрондаги операция 4 ҳафта давом этиши мумкин

АҚШ президенти Доналд Трамп фикрича, Вашингтоннинг Эрондаги ҳарбий операцияси, эҳтимол, келаси тўрт ҳафта давомида давом этади. Оқ уй раҳбари Daily Mail’га интервю берган, газета уни якшанба куни, 1 мартда эълон қилди.

Унинг версиясига кўра, барчаси режа бўйича кетмоқда. АҚШ “Эрон раҳбариятининг ҳаммасини йўқ қилди”, деб даъво қилди давлат раҳбари ва, эҳтимол, гап 48 нафар шахс ҳақида кетаётганини қўшимча қилди.

Америка етакчиси Эрон билан кейинги музокаралар учун очиқ эканини айтди, аммо улар “яқин вақт ичида” бўладими — билмаслигини билдирди.

“Мен билмайман. Улар музокара истаяпти, лекин мен шундай дедим: ‘Сизлар бу ҳафта эмас, ўтган ҳафта гаплашишингиз керак эди’”, — дея таъкидлади Трамп.

Оқ уй раҳбари 1 март куни кундузи Америка халқига мурожаат қилди. Доналд Трамп ҳалок бўлган уч нафар америкалик аскар учун “қасос олиш” ҳақида гапирди, Теҳронга нисбатан янги ултиматум қўйди ва АҚШни унинг “эркинлик” учун курашини қўллаб-қувватлашга чақирди. Daily Mail эслатишича, бу — охирги 48 соат ичида миллатга қилинган иккинчи мурожаат.

Бундан олдин, 1 мартда, Оқ уй раҳбари The Atlantic нашрига берган интервюсида Эрон ҳукуматини “улар ҳаддан ташқари узоқ кутди”, деб айблади. У сўнгги ҳафталарда Вашингтон алоқада бўлган айрим эронлик музокарачилар зарбалар натижасида ҳалок бўлганини аниқлаштирди. “Улар келишув тузиши мумкин эди. Улар буни эртароқ қилиши керак эди. Улар ҳаддан ташқари ҳийла ишлатди”, — деди Трамп.

Исроил ва Қўшма Штатлар 28 феврал тонгида Теҳрон ва Эрон ҳудудидаги бошқа жойларга зарбалар берди. Доналд Трамп Ислом Республикасининг ядровий дастурини йўқ қилиш ниятида эканини билдирди. У Эрон армиясини қуролни ташлашга, мамлакат аҳолисини эса “тақдирини ўз қўлига олиш”га чақирди.

Эрон жавобан Исроил ҳудудига ва Яқин Шарқдаги бошқа мамлакатларга зарбалар берди. АҚШ Қуролли кучларининг Марказий қўмондонлиги 28 феврал куни Эрон зарбалари натижасида Яқин Шарқдаги Америка объектларига етказилган зарар “минимал” экани ва “операцияларга таъсир қилмагани”ни билдирган эди. Бироқ 1 март куни у мазкур зарбалар оқибатида АҚШнинг уч нафар ҳарбийси ҳалок бўлгани, беш нафар ҳарбий эса оғир яралангани ҳақида хабар қилди.

Исроил-АҚШ ҳарбий операциясининг иккинчи кунида Эрон томони зарбалар натижасида мамлакатнинг олий раҳбари — Али Хоминаий ҳамда бир қатор юқори лавозимли куч тузилмалари вакиллари, жумладан мудофаа вазири Азиз Носирзода ва Ислом инқилоби муҳофизлари корпуси қўмондони Муҳаммад Пакпур ҳалок бўлганини тасдиқлади.