Чирчиқ дарёси соҳилида тозалаш ишлари бошланди

Ижтимоий тармоқларда Тошкент вилояти Қуйи Чирчиқ туманида Чирчиқ дарёси соҳили чиқиндилар билан тўлиб кетгани ҳақидаги хабарлар юзасидан мутасадди идоралар томонидан жойига чиқиб ўрганиш ишлари олиб борилди.

Фото: Тошкент вилояти Экология ва иқлим ўзгариши бош бошқармаси

Тошкент вилояти Экология ва иқлим ўзгариши бош бошқармаси Қуйи Чирчиқ туман бўлими ходимлари томонидан ўтказилган ўрганиш давомида Қуйи Чирчиқ тумани "Мевазор" МФЙ ҳудудидан оқиб ўтувчи Чирчиқ дарёси соҳилига номаълум фуқаролар томонидан турли хил маиший чиқиндилар ташлаб кетилгани аниқланди.

Айни пайтда инспекторлар томонидан махсус техникалар жалб этилган ҳолда ҳудудни тозалаш ва чиқиндиларни бартараф этиш ишлари амалга оширилмоқда.

Тошкент вилояти Экология ва иқлим ўзгариши бош бошқармаси фуқаролардан белгиланмаган жойларга чиқинди ташламаслик ва уларни ёқмасликни сўради. Шунингдек, бу каби қонунбузилиш ҳолатлари учун амалдаги қонунчиликка мувофиқ тегишли чоралар кўрилиши эслатиб ўтилди.