Ўзбекистон–Россия стратегик шериклик масалалари муҳокама қилинди

4 март куни Ўзбекистон ташқи ишлар вазири ўринбосари Бобур Усмонов Россиянинг мамлакатдаги фавқулодда ва мухтор элчиси Алексей Ерхов билан учрашув ўтказди. Учрашувда икки давлат ўртасидаги кенг қамровли стратегик шериклик ва иттифоқчилик муносабатларининг долзарб масалалари муҳокама қилинди.

Фото: ТИВ

Мулоқот давомида олий даражада эришилган келишувларнинг амалий ижроси алоҳида эътибор марказида бўлиб, уларни ҳаётга татбиқ этиш доирасидаги устувор вазифалар кўриб чиқилди.

Томонлар, шунингдек, Ўзбекистон–Россия ҳамкорлиги доирасида икки томонлама ҳамда кўп томонлама форматларда ўтказилиши режалаштирилган бўлажак тадбирлар жадвали юзасидан ҳам фикр алмашди.

Қайд этилишича, учрашувда стратегик шериклик муносабатларини янада мустаҳкамлаш, қўшма ташаббуслар ва келишувларнинг ижросини тизимли равишда мувофиқлаштириш каби йўналишлар бўйича ҳам мулоҳазалар билдирилган.