Тошкентда марказий кўчалар таъмирланиб, «ақлли» светофорлар ўрнатилмоқда

Тошкент шаҳрида кўча-йўл тармоғининг техник ҳолатини яхшилаш, ҳаракат хавфсизлиги ҳамда транспорт ўтказувчанлигини оширишга қаратилган ишлар режали асосда давом этмоқда. Жумладан, пойтахтнинг қатор марказий кўчаларида асфалтлаш, фрезалаш ва инфратузилмани янгилаш ишлари амалга оширилмоқда.

Фото: ИИБ

Хусусан, Шаҳар марказий кўчаларидан фойдаланиш, уларни сақлаш ва таъмирлаш ихтисослаштирилган бошқармаси томонидан Буюк ипак йўли ҳамда Фарғона йўли кўчаларида фрезалаш ва асфалтлаш ишлари олиб борилди.

Шунингдек, Буюк ипак йўли кўчаси бўйлаб 3 та чорраҳада «ақлли» светофорларни ўрнатиш учун ер қазиш, асфалт кесиш ва кабел ўтказиш ишлари бошланди.

Бундан ташқари, Буюк ипак йўли кўчасида жойлашган «Салом чойхонаси» автобус бекатини янгилаш мақсадида унинг пойдевор қисми таъмирланди.

Себзор кўчасида ҳам асфалтлаш ишлари давом эттирилиб, кўчанинг Абдулла Қодирий ва Нурафшон кўчалари кесишмалари оралиғидаги қисмида режа асосида фрезалаш ҳамда асфалтлаш ишлари якунланди.