Педагоглар учун ҳар йиллик мажбурий тиббий кўрик жорий этилиши мумкин

Ўзбекистонда педагог ходимларнинг саломатлигини мунтазам назорат қилиш мақсадида уларни ҳар йили мажбурий тиббий кўрикдан ўтказиш тартибини жорий этиш таклиф қилинмоқда. Бу Вазирлар Маҳкамасининг тегишли қарор лойиҳасида назарда тутилган.

Фото: Getty Imagеs

Лойиҳага кўра, республикадаги барча давлат ва нодавлат таълим ташкилотларида фаолият юритувчи педагог ходимлар ҳар йили даврий тиббий кўрикдан ўтиши мажбурий ҳисобланади.

Шунингдек, давлат таълим ташкилотларида бевосита болаларга таълим ва тарбия бериш билан банд бўлган педагоглар тиббий кўрикдан Ўзбекистон давлат бюджети маблағлари ҳисобидан, кафолатланган тиббий хизматлар доирасида ўтказилиши белгиланмоқда.

Нодавлат таълим ташкилотларида фаолият юритаётган педагоглар эса тиббий кўрикдан ташкилот маблағлари ҳисобидан, тегишли лицензияга эга давлат ёки нодавлат тиббиёт муассасаларида ўтказилиши назарда тутилган.

Лойиҳада педагогларни мажбурий тиббий кўрикдан ўтказишни ташкил этиш иш берувчининг зиммасига юклатилиши ҳам кўрсатилган. Шу билан бирга, педагог тиббий кўрикдан ўтаётган вақтда унинг иш жойи (лавозими) ва ўртача иш ҳақи сақланиб қолади.