FT: АҚШ Эрон кампаниясида бир неча йилга мўлжалланган ўқ-дори захирасини сарфлаб юборди

Доналд Трамп маъмурияти Эронга қарши уруш бошланганидан буён ўта муҳим ўқ-дориларнинг бир неча йилга мўлжалланган захирасини сарфлаб юборди, деб хабар бермоқда Financial Times вазиятдан хабардор бўлган манбага таяниб. Гап узоқ масофага ҳаракатланувчи «Tomahawk» ракеталари ҳақида ҳам бормоқда. 

Стратегик ва халқаро тадқиқотлар маркази (CSIS) ҳисоб-китобларига кўра, Яқин Шарқдаги урушнинг дастлабки 100 соати мобайнида АҚШ «Tomahawk» русумли ракеталардан 168 тасини ишлатган. «Бу жуда кўп. Ва уларнинг ўрнини тўлдириш учун йиллар кетади», – деган FT нашрига америкалик конгрессменлардан бири. 

Пентагон яқин кунлар ичида Оқ уй ва Конгрессга 50 миллиард доллар миқдорида қўшимча ҳарбий молиялаштириш бўйича расмий сўров юборишни режалаштирмоқда.

Трампнинг маъмурияти Эрон билан урушнинг дастлабки олти кунидаги харажатларни камида 11,3 миллиард долларга баҳолаган. Reuters агентлиги 11 март куни Конгрессдаги ёпиқ брифингда айнан шундай рақамлар келтирилганини ёзганди.

9 март куни The New York Times Украина Россияга қарши уруш бошидан буён Patriot тизимлари учун 600 га яқин ракета олгани, АҚШ эса Эронга қарши урушнинг бир ҳафтасида шундай ракеталардан 800 тасини ишлатиб юборгани ҳақида хабар берганди.

Оқ уй матбуот котиби Кэролайн Ливитт 12 март куни Эронга қарши амалиётнинг президент Трамп томонидан қўйилган «мақсадларига эришиш» учун Америка қуролли кучлари «етарлича» ўқ-дори ва қурол-яроғга эгалигини айтганди.