Франция “соя флоти” танкерини қўлга олди

Франция ҳарбий-денгиз кучлари 20 март, пайшанба куни эрталаб Ўрта Ер денгизида Россиянинг “соя флоти”га мансуб Deyna танкерини қўлга олди. Бу ҳақда президент Эммануэл Макрон X ижтимоий тармоғида маълум қилди. Кема Мозамбик байроғи остида Мурманск портидан кетаётган бўлган ва сохта байроқдан фойдаланганликда гумон қилинган. Франциянинг Ўрта Ер денгизи бўйича префектураси маълум қилишича, операция британиялик иттифоқчилар билан ҳамкорликда ўтказилган.

Макрон таъкидлашича, Яқин Шарқдаги уруш Францияни Украинага ёрдам беришдан чалғитмайди. Унинг сўзларига кўра, “соя флот” кемалари халқаро санкцияларни четлаб ўтади, денгиз ҳуқуқини бузади ва Россиянинг ҳарбий ҳаракатларини молиялаштиради.

Бу бир ҳафта ичида Россия нефтини ташиётган танкерларни қўлга олиш бўйича иккинчи ҳолатдир — бундан олдин Швеция Бразилиядан Приморскка йўл олган Sea Owl кемасини тўхтатган эди. Франция флоти учун эса бу йил бошидан буён шунга ўхшаш иккинчи ҳодиса бўлди.

Январ ойи охирида Франция Ҳарбий-денгиз кучлари Ўрта Ер денгизида Россиядан Комор ороллари байроғи остида, ҳинд экипажи билан кетаётган санкция остидаги Grinch танкерини ҳам қўлга олган эди. Ўшандаги операция ҳам Британия томонидан берилган разведка маълумотлари кўмагида ўтказилган.

Франция ҳокимияти кема капитанини — 58 ёшли Ҳиндистон фуқаросини ҳибсга олди, танкернинг ўзи эса Марсел прокуратураси ихтиёрига топширилди. Кема фақат феврал ўрталаридaгина бир неча миллион евро миқдорида жарима тўланганидан кейин озод қилинган.

Россия Ташқи ишлар вазирлиги вакили Мария Захарова эса қўлга олинган Grinch танкери “Россия билан ҳар қандай алоқадан маҳрум” эканини айтди ва на юк, на унинг эгаси ҳақида ҳеч нарса билмаслигини билдирди.