Суперлига. «Сўғдиёна»нинг биринчи ғалабаси ва Бабаяннинг истеъфоси

Ўзбекистон Суперлигасида 7-тур ўйинлари ўтказилди. «Пахтакор» аутсайдер билан ўйинда ғалаба қозониб, пешқадамликни сақлаб қолди. «Сўғдиёна» мавсумда биринчи марта зафар қучди, жамоа ҳануз сўнгги ўринларда бормоқда. «Андижон» мағлубиятга учради ва бош мураббий Самвел Бабаян билан хайрлашди.

Фото: stadion.uz

12-14 апрель кунлари футбол бўйича Ўзбекистон Суперлигасида 7-тур ўйинлари ўтказилди.

ПАХТАКОР 2:1 МАШЪАЛ

Голлар: Фламарион, 41 (1:0), Шаҳбоз Жўраев, 45+2 Автогол (2:0), Шаҳбоз Жўраев, 67 (2:1)

«Пахтакор» сўнгги ўринда бораётган «Машъал»ни қийинчилик билан мағлуб этди. Тошкентликлар бу ғалабадан кейин пешқадамликни сақлаб қолди. Муборакликлар ҳали бирорта очко жамғармаган ҳолда жадвал тубини «банд этган».

БУНЁДКОР 0:1 НЕФТЧИ

Гол: Йован Жокич, 45 (0:1)

Аввалги турда биринчи марта очко йўқотган «Нефтчи» ғалабали йўлга қайтди. Фарғоналиклар ягона гол эвазига «Бунёдкор»ни мағлуб этди. «Нефтчи» пешқадам «Пахтакор» билан тенг очко жамғарган, аммо ўзаро ўйин натижасига кўра иккинчи ўринда бормоқда.

АНДИЖОН 1:2 ОКМК

Голлар: Нодирбек Абдураззоқов, 29 (0:1), Урош Койич, 36 (0:2), Иброҳим Йўлдошев, 86 (1:2)

Чемпионат стартининг омадсизлари Андижонда учрашди. Ўйиндан олдин ҳар иккала жамоа бош мураббийлари учун бу сўнгги имконият экани ҳақида хабарлар тарқалди. Якунда Миржалол Қосимов бошқарувидаги ОКМК ғалаба қозонди. «Андижон» эса Самвел Бабаянни истеъфога чиқарди, унинг қўл остида жамоа 7 та ўйиннинг 5 тасида ютқазди.

НАВБАҲОР 2:0 СУРХОН

Голлар: Алекс Фернандес, 26 (1:0), Ваня Илич, 78 (2:0)

«Сурхон»ни ишончли тарзда мағлуб этган «Навбаҳор» учинчи ўринга кўтарилди. Энди жамоа пешқадамлардан 3 очко ортда қолмоқда. Наманганликларга легионерларнинг голлари ғалаба келтирди.

НАСАФ 1:1 БУХОРО

Голлар: Зафармурод Абдураҳматов, 60 (1:0), Темур Мамасиддиқов, 77 (1:1)

Четлатиш: Умарбек Эшмуродов, 79 (Насаф)

«Бухоро» ҳайрон қолдиришда давом этмоқда ва бу сафар «Насаф»дан очко олишга эришди. Александр Хомяков шогирдлари 4-ўринга кўтарилиб олди. «Насаф» 6-ўринга тушди.

ДИНАМО 1:2 ЛОКОМОТИВ

Голлар: Темурхўжа Абдухолиқов, 34 (0:1), Темурхўжа Абдухолиқов, 40 (0:2), Азизбек Амонов, 60 (1:2)

Четлатиш: Фирдавс Абдураҳмонов, 90+3 (Динамо)

«Динамо» ўз майдонида кутилмаганда «Локомотив»га ютқазди. Вадим Абрамов жамоаси муваффақиятсиз ўйинлар оқибатида 12-ўринга тушиб кетди. «Локомотив» 7-ўринга кўтарилди.

ҚИЗИЛҚУМ 1:3 СЎҒДИЁНА

Голлар: Люпчо Дориев, 29 (0:1), Файсал Мулич, 41 (0:2), Отабек Жўрақўзиев, 60 (0:3), Самандар Шукруллаев, 70 (1:3)

«Сўғдиёна» мавсумдаги биринчи ғалабасини Навоийда қўлга киритди. Жадвал тубидан ўрин олган жамоалар баҳсида 4 та гол урилди ва якунда жиззахликлар зафар қучди.

ХОРАЗМ 2:2 ҚЎҚОН-1912

Голлар: Бубакар Траоре, 6 (1:0), Силванус Нимели, 25 (1:1), Сунатуллоҳ Ҳамиджонов, 50 (2:1), Сунатуллоҳ Ҳамиджонов, 60 автогол (2:2)

Четлатиш: Аслиддин Тоштемиров, 90+4 (Қўқон-1912)

«Хоразм» ва «Қўқон-1912» ўйини ҳам голларга бой бўлди. Якунда жамоалар «муроса» кўчасини танлаб, жанговар дурангга имзо чекди.

6-турдан кейин Суперлига жадвали