Roche Diagnostics компанияси Тошкентда Roche Day тадбирини ўтказиб, Ўзбекистонда лаборатория диагностикасини ривожлантиришга қаратилган илғор ечимларни тақдим этди

​Учрашувда асосий эътибор касалликларни эрта аниқлаш, клиник қарор қабул қилиш аниқлигини ошириш ҳамда лабораториялар ва тиббиёт муассасалари фаолияти самарадорлигини қўллаб-қувватлашга қаратилган ечимларга қаратилди. Тадбир давомида компания бир қатор устувор йўналишлар бўйича ўз ишланмаларини тақдим этди. Жумладан, Алцгеймер касаллиги диагностикасига замонавий ёндашувлар, юрак-қон томир касалликларини аниқлаш усуллари, клиник қарор қабул қилишни қўллаб-қувватловчи рақамли алгоритмлар ҳақида таништирилди.

​Меҳмонлар таъкидлашича, Roche Day тадбири замонавий диагностика технологияларининг бемор даволаниш жараёни барча босқичларида мутахассисларга қандай ёрдам бериши масаласини муҳокама қилиш учун профессионал мулоқот майдонига айланди. Хусусан, скрининг ва дастлабки баҳолашдан бошлаб, хавфни стратификация қилиш, даволаш стратегиясини танлаш, прогнозни аниқлаш ҳамда терапия самарадорлигини мониторинг қилишгача бўлган жараёнлар ҳақида фикр алмашилди.

​Шунингдек, иштирокчилар лаборатория автоматизациясининг аҳамиятига ҳам тўхталиб ўтди. Маълум қилинишича, бундай тизимлар натижалар аниқлиги ва такрорланувчанлигини оширади, инсон омили таъсирини камайтиради ҳамда бемор манфаатлари йўлида янада самарали лаборатория жараёнларини шакллантиришга хизмат қилади.

​“Бугунги кунда IVD диагностикаси замонавий тиббиётнинг асосий пойдеворларидан бири ҳисобланади. Соғлиқни сақлаш харажатларининг ўртача 2 фоизини ташкил этишига қарамай, лаборатория натижалари барча клиник қарорларнинг 70 фоиздан ортиғига асос бўлади. Roche Diagnostics компанияси учун бу катта масъулиятни англатади: бемор саломатлиги ҳамда бутун тизим самарадорлиги бевосита боғлиқ бўлган маълумотларнинг аниқлигини таъминлаш асосий миссиямиздир”, – дейди Roche Diagnostics компаниясининг Марказий Осиё ва Кавказ минтақаси бўйича соғлиқни сақлаш инновациялари раҳбари Жанар Канибекова.

​Таъкидланишича, Roche Day тадбири давомида Алцгеймер касаллиги ҳамда когнитив бузилишларни эрта аниқлаш масалаларига алоҳида эътибор қаратилди. Иштирокчилар ушбу йўналишнинг соғлиқни сақлаш тизимлари учун тобора долзарб бўлиб бораётгани, диагностикада объектив маълумотларнинг аҳамияти ҳамда когнитив функциялар пасайишининг дастлабки белгилари пайдо бўлган пайтда беморларни ўз вақтида мутахассисларга йўналтириш муҳимлигини муҳокама қилди.

​“Алцгеймер ва деменциянинг бошқа шакллари кучли эътиборни талаб қилади. Когнитив ўзгаришларнинг дастлабки белгиларини фақат ёш билан боғлаб қўймасдан, беморни ўз вақтида қўшимча текширувларга йўналтириш муҳим. Мутахассис қўлида диагностика воситалари қанчалик эрта пайдо бўлса, бемор ва унинг оиласини ўз вақтида қўллаб-қувватлаш имкониятлари шунчалик кенгаяди”, – дейди тиббиёт фанлари номзоди, психотерапевт Жибек Жолдассова.

​Roche Diagnostics компанияси Ўзбекистонни замонавий диагностика тизимини ривожлантириш ва тиббиёт ҳамжамияти билан профессионал ҳамкорликни кенгайтириш учун стратегик муҳим локациялардан бири сифатида кўради. Компания шифокорлар, лаборатория мутахассислари ҳамда соғлиқни сақлаш тизими менежерларига ишончли диагностик маълумотларни олиш, иш жараёнларини оптималлаштириш ва клиник қарорлар қабул қилишда самарали ечимлар тақдим этишга қаратилган технологияларни ривожлантирмоқда.

​Roche Day тадбирининг Тошкентда ўтказилиши замонавий диагностика ечимларига тиббиёт ҳамжамияти томонидан юқори қизиқиш мавжудлигини яна бир бор тасдиқлади. Мутахассислар фикрича, илғор диагностика технологияларининг жорий этилиши соғлиқни сақлаш тизими ривожига хизмат қилиб, Ўзбекистонда замонавий тиббий имкониятлардан фойдаланиш кўламини кенгайтиришга ёрдам беради.

​Roche Diagnostics компаниясининг Марказий Осиё ва Кавказ минтақаси бўйича бўлими

​Roche ҳақида

Roche (SIX: RO, ROP; OTCQX: RHHBY) – диагностика, дори воситалари ва рақамли ечимлар соҳасидаги илғор илм-фан ҳамда технологияларни бирлаштирган глобал соғлиқни сақлаш компанияси бўлиб, касалликларнинг олдини олиш, уларни тўхтатиш ва даволашга қаратилган ечимларни ишлаб чиқади.

​Компания 1896 йилда Швейцариянинг Базель шаҳрида ташкил этилган. Бугунги кунда Roche дунёнинг 150 дан ортиқ мамлакатида миллионлаб беморлар учун инновацион дори воситалари ва диагностика ечимларини тақдим этаётган етакчи компаниялардан бири ҳисобланади.

​Ташкилот фаолияти беморлар, уларнинг оилалари, жамият ҳамда соғлиқни сақлаш тизимларига энг катта юк бўлаётган касалликларга қарши курашишга қаратилган. Roche ўзининг диагностика ва фармацевтика йўналишлари орқали қуйидаги асосий тиббий соҳаларга эътибор қаратади:

• ​онкология
• ​неврология
• ​юрак-қон томир ва метаболик касалликлар
• ​офтальмология
• ​юқумли касалликлар
• ​иммунология.

​Компаниянинг мақсади беморлар, уларнинг яқинлари ва соғлиқни сақлаш соҳасида фаолият юритаётган мутахассислар ҳаётида реал, ижобий ўзгаришлар яратишдир.

​АҚШда жойлашган Genentech Roche Group таркибига тўлиқ тегишли шўба компания ҳисобланади. Шунингдек, Roche Япониядаги терапевтик антитана бозорида етакчи инноваторлардан бири бўлган Chugai Pharmaceutical компаниясининг асосий акциядоридир.

​Қўшимча маълумот учун компания расмий сайтига ташриф буюринг: www.roche.com

Мазкур материалда келтирилган барча савдо белгилари қонун билан ҳимояланган.

Реклама ҳуқуқи асосида