7000+ ассортимент, нарх ва сифат мувозанати: 25 йиллик тажрибага эга Tekled бренди асосчиси билан суҳбат

Бугун қурилиш бозорлари ва савдо марказларида ёритиш маҳсулотлари танлови кенг: чироқ, розетка, кабель ва бошқа электр жиҳозлари турли нарх ҳамда сифат сегментида сотилмоқда. Бироқ арзон маҳсулотлар фонида барқарорлик, хавфсизлик масаласи кўпинча иккинчи планда қолмоқда. Айрим ҳолларда эса сифатсиз электротехника жиҳозлари электр тармоқларида носозликлар, ҳатто ёнғинларга ҳам сабаб бўлаётгани кузатилади. Хўш, аслида ёритиш маҳсулотларини тўғри танлашда қайси жиҳат кўпроқ муҳим? Kun.uz мухбири айни шу мавзуда Tekled компанияси директори Муротжон Жўраев билан суҳбатлашди.

Tekled компанияси бугун Ўзбекистонда ёритиш ва электротехника маҳсулотларининг кенг ассортиментларини таклиф қилувчи брендлардан бири сифатида тилга олинади. Компания вакилларига кўра, ташкилотнинг асосий устунлиги фақат маҳсулот эмас, 25 йиллик тажриба ва глобал ҳамкорлик занжиридир.

Маълум қилинишича, компания илгари Osram, Philips, General Electric каби йирик брендлар билан ишлаган, шунингдек, Viko by Panasonic’нинг Ўзбекистондаги расмий дистрибютори бўлган. Бугунги кунда эса барча йўналишлар Tekled ва Tekled Electric брендлари остида бирлаштирилган.

“Асосий тамойилимиз ўзгармаган: сифат, катта ҳажмда мавжуд маҳсулот ва нархлардаги мувозанат. Кенг ассортимент деганда мижоз битта жойга кириб, оддий лампочкадан тортиб мураккаб саноат ёритгичлари, декоратив люстралардан ташқи фасад ёритиш тизимларигача бўлган барча керакли маҳсулотларни топа олишини назарда тутамиз. Одам турли бозорларни айланиб вақт йўқотмаслиги, битта жойнинг ўзида ечимга эга бўлиши биз учун жуда муҳим.

Катта ҳажмда маҳсулот мавжудлиги ҳам шунчаки рақам эмас. Бу реал эҳтиёж. Бизда кўп товарлар омборда тайёр туради. Ушбу имконият мижозга кутишсиз, тез ва аниқ ечим беради. Айниқса, қурилишдаги йирик лойиҳаларда мазкур жиҳат катта аҳамиятга эга, негаки вақт йўқотиш пул йўқотиш билан тенгдир”, – дейди бренд асосчиси Муроджон Жўраев.

Унинг сўзларига кўра, ёритиш маҳсулотларини танлашда истеъмолчи биринчи навбатда нархга эмас, қуйидаги тўртта омилга эътибор бериши керак: энергия тежамкорлиги, сифат, дизайн ва ҳамёнбоплик.

“Энг муҳим нарса – тежамкорлик. Чунки бу электр харажатига бевосита таъсир қилади. Кейин сифат туради. Дизайн ва нарх эса охирги омиллардир”, – дейди у.

Реал бозор амалиёти шуни кўрсатадики, нарх, одатда, сифат билан боғлаб қўйилади. Маҳсулот арзон бўлса, автоматик тарзда “паст сифатли” деган фикр шаклланади. Мутахассис эса бу ёндашувни тўлиқ тўғри деб ҳисобламайди. Унинг фикрича, нархни тушириш ҳар доим ҳам сифатни пасайтириш ҳисобига бўлмайди. Аксинча, вазият ишлаб чиқариш миқёси, логистика занжири ва технологик жараёнларга боғлиқ.

“Масалан, бир маҳсулот 100 дона эмас, 1000 дона ҳажмда ишлаб чиқарилса, таннарх сезиларли даражада тушиши мумкин. Бу эса якуний нархга ҳам таъсир қилади”, – дейди Муроджон Жўраев.

Шу билан бирга, у мазкур йўналишда етарлича муаммолар ҳам борлигини инкор этмайди. Паст сифатли кабель, арзон патронлар, нотўғри йиғилган конструкциялар маҳсулотнинг тез ишдан чиқишига олиб келиши мумкин.

“Баъзан ташқи кўриниши чиройли, лекин ички қисми жуда паст сифатли маҳсулотлар ҳам учрайди. Энг катта хавф мижознинг бир қарашда фарқни сезмаслигида. Нотўғри йиғилган ёки сифатсиз материаллардан тайёрланган ёритиш ускуналари электр тармоғида ортиқча қизиш ҳосил қилиб, қисқа туташувга сабаб бўлиши эҳтимоли мавжуд. Бу эса айрим ҳолларда ёнғин хавфини келтириб чиқаради”, – дейди у.

Компания раҳбарига кўра, Tekled бренди маҳсулотлари 180–250 вольт диапазонида барқарор ишлашга мослаштирилган. Бу маҳаллий электр тармоқларидаги тебранишларни ҳисобга олган ҳолда ишлаб чиқилган техник ечим ҳисобланади. LED лампалар эса анъанавий ёритиш воситаларига нисбатан 5–20 фоизгача энергия тежамкорлиги билан ажралиб туради.

Дўконлардаги фасад ёритгичлари, кўча лампалари ва прожекторлар IP65 даражадаги ҳимоя тизимига эга. Мазкур маҳсулотлар ёмғир, қор ва чанг шароитида ҳам ишлашга мўлжалланган. Мутахассисларнинг айтишича, сифатли ишлаб чиқарилган бу каби ёритгичлар 5–6 йилгача рангини йўқотмайди ва ташқи муҳит таъсирига бардош беради.

Айни вақтда Tekled бренди остидаги савдо нуқталарида 7000 дан ортиқ ассортиментдаги ёритиш маҳсулотларини топиш имкони мавжуд.

Кўрсатувни тўлиқ ҳолда Kun.uz’нинг YouTube’даги саҳифасида томоша қилишингиз мумкин.

 
Реклама ҳуқуқи асосида