Россия Украина бўйлаб юзлаб дронлар учирди

Киев шаҳар ҳарбий маъмурияти раҳбари Тимур Ткаченконинг маълум қилишича, шаҳарнинг жануби-шарқидаги Дарницкий туманида кўп қаватли уйга зарар етган. Бино конструкциясининг бир қисми қулаган ва вайроналар остида одамлар қолиб кетган. Ҳодиса жойига қутқарув хизматлари юборилган.

Киев мэри Виталий Кличко ҳам шаҳарнинг бошқа туманларида катта вайронагарчиликлар бўлганини билдирди.

Днипро туманида дрон бўлаклари беш қаватли уй томига тушиб, ёнғин келтириб чиқарган. Шу ҳудудда яна бир дрон хусусий уйга урилган.

Киев шимолида дрон бўлаклари 12-қаватдаги квартирага тушиб, ёнғин чиққан. Шевченко, Соломенский ва Оболон туманларида нотурар бинолар шикастланган.

Соломенский туманида бизнес-марказ ёнидаги автотураргоҳда автомобиль ёнган. Дарницкий туманида АЁҚШда ёнғин чиққан. Голосеевский туманида дрон бўлаклари бизнес-марказ ва йўл қисмига тушган.

Сўнгги маълумотларга кўра, Киевда камида 9 киши шифохонага ётқизилган, яна икки нафар жабрланганга жойида тиббий ёрдам кўрсатилган. Қидирув-қутқарув ишлари давом этмоқда.

Украина Қуролли кучлари ҳаво кучлари маълумотига кўра, Россия нафақат Киев, балки Харькив, Полтава, Суми, Донецк, Одесса, Миколайив, Днипропетровск ва Черкасси вилоятларига ҳам ракета, дрон ва бошқариладиган авиабомбалар йўналтирган.

Украина томонининг билдиришича, ўтган сутка давомида Россия 892 та дрон учирган. Улардан 710 таси ҳаво мудофаа тизимлари томонидан йўқ қилинган ёки зарарсизлантирилган.

Шунингдек, уруш бошланганидан бери биринчи марта Карпаторти вилояти маркази — Ужгород шаҳри ҳам ҳужумга учрагани айтилмоқда. Шаҳарда бир нечта портлаш овозлари эшитилган.