Хитойнинг “янги автоимперия”си: машина ишлаб чиқарувчидан технологик гигантга айланган компания – Geely

Пекин. Улкан павильонлар, роботлар, сунъий интеллект, овоз билан бошқариладиган электромобиллар ва ҳайдовчисиз капсулалар: “Auto China 2026” кўргазмаси транспорт саноати келажаги қандай бўлишини кўрсатадиган майдонга айланди. Унда Хитойнинг энг тез ўсаётган автомобил гигантларидан бири – Geely ўзининг энг сўнгги инновациялари билан иштирок этди. Халқаро медиа вакиллари учун ёпиқ матбуот анжуманида компаниянинг бугунги ҳолати, глобал стратегияси ва технологик амбициялари ҳақида сўз борди.

Бир неча йил олдин Хитой автомобиллари ҳақида гап кетганда кўпчиликнинг хаёлига арзон ва сифати паст машиналар келарди. Бугун эса вазият ўзгарган. Энди ушбу мамлакат компаниялари глобал бозорда фақат нарх билан эмас, технологик жиҳатдан ҳам рақобатлашмоқда. Geely бунга энг яққол мисоллардан бири бўлиб турибди.

1998 йилда илк автомобилини ишлаб чиқарган компания бугун Volvo, Polestar, Lotus, ZEEKR ва Lynk & Co каби йирик брендларни қамраб олган глобал холдингга айланган. Ташкилотнинг стратегияси эса оддий: энди фақат машина ишлаб чиқаришнинг ўзи етарли эмас.

Пекиндаги кўргазмада Geely айнан шу ёндашувни намойиш қилди. Компания сунъий интеллект асосидаги роботлар, ультра тезкор қувватлаш технологиялари, ақлли хавфсизлик тизимлари ва ҳайдовчисиз транспорт платформаларини тақдим этди. Энг катта қизиқишлардан бири эса L4 автоном роботакси концептига қаратилди.

Бу автомобилда рул ҳам, педаль ҳам йўқ. Ички салон эса мобил офис ёки дам олиш ҳудудини эслатади. Барча бошқарув “Super Eva” сунъий интеллекти орқали амалга оширилади. Geely’нинг G-ASD 4.0 тизими кузов ичига яширилган сенсорлар ёрдамида йўлни тўлиқ назорат қилади.

Таькидланишича, бу концепт битта нарсани тасдиқлайди: автомобиль саноати аста-секин транспорт воситаси ишлаб чиқаришдан мобил технологиялар экотизимига айланяпти. Чунки бугунги автомобиль бозорида қиймат фақат мотор қуввати ёки ташқи дизайн билан ўлчанмаяпти. Асосий рақобат батарея технологияси, сунъий интеллект, автоном бошқарув ва дастурий таъминот устида кетмоқда.

Geely бу пойгада ортда қолишни истамаяпти. Компания ўзининг “AI Mobility Ecosystem” стратегияси орқали автомобилни шунчаки транспорт воситаси эмас, рақамли ҳаётнинг бир қисми сифатида кўрсатяпти.

Кўргазмадаги энг қизиқ йўналишлардан бири янги энергия автомобиллари сегменти бўлди. Geely Galaxy M7 модели 225 километргача соф электр юриш имконияти ва 1730 километргача умумий юриш захираси билан тақдим этилди. Бу кўрсаткичлар Хитой компаниялари технологик жиҳатдан узоқ масофага мўлжалланган ва кундалик фойдаланишга қулай моделлар яратишга ҳам ўтаётганини билдиради.

Шунингдек, компания i-HEV ақлли гибрид технологиясини фаол тарғиб қилмоқда. Geely маълумотларига кўра, Emgrand i-HEV модели реал синовларда 100 километрга 2,22 литр ёқилғи сарфлаган.

Медиа тур давомида журналистлар Geely’нинг Ҳанчжоу ва Нингбо шаҳарларидаги заводлари, тест марказлари билан танишди. Автоҳалокат синови (crash-test) ҳудудидаги намойишлар компания хавфсизлик масаласини маркетингдан кўра стратегик устунлик сифатида кўраётганини тасдиқлади.

Маълумот учун, Geely 2025 йилда 4 миллиондан ортиқ автомобиль сотди. Сотувларнинг катта қисмини электромобил ва гибрид моделлари ташкил қилмоқда.