НАТОнинг Европадаги бирлашган қуролли кучлари бош қўмондони генерал Алексус Гринкевич Брюсселда бўлиб ўтган альянс Ҳарбий қўмитаси йиғилиши якунлари бўйича матбуот анжуманида Украина учун устувор эҳтиёжлар рўйхати — PURL дастури доирасидаги барча қурол-яроғ етказиб берилаётганини айтди.
“Мен сизларни ишонтирмоқчиманки, иттифоқчилар тўлов қилган барча қуроллар, жумладан украиналиклар шошилинч эҳтиёж сезаётган ҳаво ҳужумидан мудофаа тизимлари учун тутиб қолувчи ракеталар ҳам етказиб берилмоқда”, — деди Гринкевич.
Унинг таъкидлашича, Украина қуролли кучлари урушнинг бешинчи йили давом этаётганига қарамай, юқори даражада чидамлилик ва инновацион ёндашувни намоён этмоқда. Шу билан бирга, украин ҳарбийлари НАТО давлатлари билан жанг майдонида синовдан ўтган тажрибаларини, айниқса Россия ва Эрон дронлари ҳамда ракеталарига қарши кураш усулларини баҳам кўрмоқда.
Гринкевич Украинага доимий ва прогноз қилинадиган ёрдам зарурлигини таъкидлаб, PURL дастури айнан шу мақсадга хизмат қилишини қайд этди.
Мазкур дастур АҚШ ва НАТО ташаббуси бўлиб, у орқали Украинага АҚШда ишлаб чиқарилган муҳим қуроллар етказиб берилади. Дастурда иштирок этаётган давлатлар Украина, АҚШ ва НАТО келишган эҳтиёжлар рўйхати асосида умумий жамғармага маблағ ажратади. Бу эса Европа аналоглари билан алмаштириб бўлмайдиган қуролларни тезкор сотиб олиш ва фронтга етказиш имконини беради.
Генерал Гринкевич Ғарбнинг Украина мудофаасига сармояси нафақат украин аҳолиси ва муҳим инфратузилмани ҳимоя қилиш, балки Европа хавфсизлигини мустаҳкамлашга ҳам хизмат қилаётганини билдирди.
Матбуот анжуманида у АҚШ президенти Дональд Трампнинг Европадан 5 минг нафар америкалик ҳарбийни олиб чиқиш ниятини ҳам тасдиқлади. Бироқ унинг сўзларига кўра, АҚШ ҳарбий иштирокининг қисқариши НАТОнинг минтақавий режалари бажарилишига таъсир қилмайди.
Гринкевич Россиянинг Украинага кенг кўламли босқини бошланганидан бери Болтиқбўйи давлатлари, Польша ва бошқа Европа мамлакатлари ўз қуруқликдаги ҳарбий салоҳиятини сезиларли даражада оширганини таъкидлади. У, шунингдек, Канада раҳбарлигидаги Латвияда жойлашган кўп миллатли бригада юқори самара кўрсатаётганини, Германия эса Литвадаги бригадасини кенгайтиришда давом этаётганини қайд этди.
“Иттифоқчилар ўз имкониятларини кучайтираётган экан, АҚШ ўз ресурсларини бошқа глобал устувор йўналишларга йўналтириши мумкин”, — деди генерал.
