Янги ишлаб чиқариш биносининг очилиш маросими 2026 йил 29 сентябрда бўлиб ўтган. Унда минтақавий йўналишлар учун мўлжалланган турбовинтли D328eco самолётлари йиғилади.
Корпус майдони 60 500 квадрат метрни ташкил этади. Бу тахминан саккизта футбол майдонига тенг.
Германия авиация саноати фюзеляж қисмлари, қанотлар, кабина элементлари ва двигателларни катта ҳажмда ишлаб чиқаради. Бироқ йўловчи самолётини лойиҳалашдан тортиб сертификатлаш, тўлиқ йиғиш ва фойдаланиш даврида техник қўллаб-қувватлашгача бўлган босқичларни ягона миллий дастурда бирлаштириш анчадан буён амалга оширилмаган.
Deutsche Aircraft бош директори Нико Нойманн янги лойиҳани илдизларга қайтиш деб атаган. Унинг сўзларига кўра, 60 йилдан ортиқ вақт ичида илк бор самолётнинг бутун ҳаётий цикли битта Германия дастури доирасида қамраб олинади.
D328eco бутунлай янгидан яратилган самолёт эмас. У аввалги Dornier 328 моделининг такомиллаштирилган варианти ҳисобланади. Дастлабки Dornier 328 илк парвозини 1991 йил декабрида амалга оширган. Fairchild Dornier компанияси 2002 йилда банкрот бўлганидан кейин эса уни ишлаб чиқариш тўхтаган.
Янги версияда фюзеляж тахминан икки метрга узайтирилиб, 23,3 метрга етказилган. Йўловчи сиғими 40 кишигача оширилган — бу дастлабки моделга нисбатан қарийб 20 фоиз кўп.
Аввалги двигателлар ўрнига ҳар бири 2750 от кучига эга PW127XT-S турбовинтли двигателлари ўрнатилган. Учувчилар кабинаси ва бортнинг электрон бошқарув ҳамда навигация ускуналари ҳам тўлиқ янгиланган.
D328ecoʻнинг парвоз синовлари учун мўлжалланган биринчи нусхаси 2025 йил майида Оберпфаффенхофендаги йиғув цехидан олиб чиқилган.
Ўша пайтда компания самолётнинг тип сертификатини олиш ва тижорий фойдаланишни 2027 йилнинг тўртинчи чорагида бошлашни режалаштирган эди.
