Қозондан бемор ўзбекистонлик фуқаро ватанга олиб келинди

Татаристонда меҳнат фаолиятини олиб бораётган вақтда соғлиғида жиддий муаммолар юзага келган ўзбекистонлик фуқаро Ўзбекистон дипломатлари ва мутасадди ташкилотлар кўмагида эсон-омон қайтарилди. Айни пайтда у шифокорлар назорати остида даволанмоқда.

Маълум қилинишича, 1969 йилда туғилган У.Ш.В. Татаристонда вақтинчалик меҳнат фаолиятини амалга ошираётган вақтда аҳволи оғирлашиб, шошилинч равишда маҳаллий клиник шифохонага ётқизилган. Шифокорлар унинг ҳолатини оғир деб баҳолаб, тезкор тиббий ёрдам кўрсатган.

Ушбу ҳолатдан сўнг Ўзбекистоннинг Қозон шаҳридаги Бош консулхонаси томонидан зудлик билан тегишли чоралар кўрилган. Хусусан, Миграция агентлиги билан ҳамкорликда фуқарони ватанга қайтариш учун зарур ташкилий ва ҳуқуқий ишлар амалга оширилган.

Қисқа муддат ичида барча консуллик ҳужжатлари расмийлаштирилиб, тиббий репатриация жараёни учун тайёргарлик ишлари якунланган. Шунингдек, Ўзбекистон Соғлиқни сақлаш вазирлиги, Uzbekistan Airways ва бошқа мутасадди идоралар билан ҳамкорликда бемор фуқарони махсус кузатув асосида “Қозон — Тошкент” йўналиши орқали олиб келиш ишлари ташкил этилган.

Тезкор ва мувофиқлаштирилган чора-тадбирлар натижасида ватандош Ўзбекистонга эсон-омон етказилди. Ҳозирда у мамлакатда шифокорлар назорати остида даволанишни давом эттирмоқда.