Зеленский: Patriot ракеталари етишмаяпти

Украина президенти Володимир Зеленский АҚШ президенти Дональд Трамп ва Конгрессга мурожаат қилиб, Россиянинг кучайиб бораётган ракетавий ҳужумлари фонида Киевга Patriot ҳаво мудофаа тизимлари ҳамда тутиб олувчи ракеталарни етказиб беришда ёрдам сўради.

Фото: AP

Reuters ва AFP агентликлари келтирган мактуб парчаларига кўра, Зеленский Россиянинг баллистик ракеталари “Москва жанговар майдонда сақлаб қолаётган сўнгги муҳим устунлик” эканини таъкидлаган.

Украина раҳбари Киев зарур миқдордаги Patriot мажмуалари ва улар учун тутиб олувчи ракеталарни сотиб олишга тайёрлигини билдирган.

Маълум қилинишича, Трамп АҚШ президенти лавозимига киришганидан кейин Украина ҳаво мудофаа тизимларини НАТОнинг PURL — “Украина эҳтиёжларининг устувор рўйхати” дастури орқали харид қилиб келмоқда. Мазкур ташаббус Европа иттифоқчилари томонидан молиялаштирилади.

“Аммо PURL дастури доирасидаги етказиб бериш суръати биз дуч келаётган таҳдид даражасига мос келмаяпти”, — деган Зеленский.

Унинг таъкидлашича, “Patriot батареяларининг ракета захираларисиз қолганини кўриш — омон қолиш учун курашаётган миллат учун энг оғриқли ҳолатлардан бири”.

AFP агентлигига Украина президенти маъмуриятидаги юқори мартабали манба ҳам ҳаво мудофаа тизимлари учун ўқ-дорилар харид қилиш мураккаб вазифага айланганини айтган.

“Ҳозир ракеталарни топиш қийин, чунки Форс кўрфази давлатлари ва бошқа ҳудудларда ҳам буюртмалар жуда кўп. Шу билан бирга, PURL доирасидаги етказиб беришлар ҳам секинлашган”, — деган манба.

Хабарда айтилишича, 24 майга ўтар кечаси Россия Украинага 90 та ракета ва 600 та дрон билан ҳужум қилган. Асосий нишонлар Киев ва Киев вилоятидаги Била Церква шаҳри бўлган.

Украина Ҳаво кучлари маълумотига кўра, Россия мазкур ҳужумда ўрта масофали “Орешник” баллистик ракетасидан ҳам фойдаланган.