Энди АҚШ дипломини Тошкентда олиш мумкин: Юта университети кампуси очилади

Олий таълим, фан ва инновациялар вазири Қўнғиротбой Шарипов, «Олмалиқ кон-металлургия комбинати» АЖ бошқарув раиси Абдулла Хурсанов ҳамда Юта университетининг халқаро ҳамкорлик бўйича вакили Рэнди Маккриллис ўртасида имзоланган келишувга кўра, Тошкентда университетнинг янги кампуси очилади.

Кампусда кончилик муҳандислиги, машинасозлик, кимё муҳандислиги, биотиббиёт ва муҳандислик менежменти каби йўналишлар бўйича кадрлар тайёрлаш режалаштирилган.

Лойиҳа Ўзбекистон иқтисодиётида жадал ривожланаётган тоғ-кон саноати, металлургия, кимё ва юқори технологияли ишлаб чиқариш тармоқларини малакали мутахассислар билан таъминлашга қаратилган.

Ташаббуснинг ўзига хос жиҳати шундаки, унда мамлакатнинг йирик саноат корхоналаридан бири бўлган Олмалиқ кон-металлургия комбинати ҳам иштирок этмоқда. Бу эса талабаларга ўқиш давридаёқ ишлаб чиқариш амалиётини ўташ, саноат корхоналари билан ҳамкорлик қилиш ва реал лойиҳаларда иштирок этиш имконини беради.

Мутасаддилар фикрича, янги кампус таълим ва ишлаб чиқариш ўртасидаги ҳамкорликни мустаҳкамлаш, меҳнат бозори талабларига жавоб берадиган рақобатбардош кадрлар тайёрлашга хизмат қилади.

Маълумот учун, Юта университети халқаро кампуслар ташкил этиш бўйича катта тажрибага эга бўлиб, унинг Жанубий Кореянинг Инчхон шаҳридаги кампуси ҳозирда минглаб талабалар таҳсил олаётган йирик таълим марказларидан бири ҳисобланади.