DW хабарига кўра, понтифик 28 сентябр куни Францияга тўрт кунлик ташрифини якунлар экан, Мец шаҳрида дунёда шафқатсизлик кучайиб бораётганидан огоҳлантирган.
«Бугунги кунда одамлар ўртасидаги ва давлатлараро муносабатлар тобора ваҳшиёна тус олмоқда», — деган у «Европа ибтидосида — тинчлик ва бирлик йўлида» номли учрашувда.
Лев XIVнинг фикрича, Европа ўзи шакллантириб, сақлаб қолишга эришган инсонга ҳурмат тамойили орқали сиёсатдаги тобора чуқурлашаётган таназзулни тўхтата олади.
Мецдаги рамзий ташриф
Мец шаҳри Европа интеграцияси асосчиларидан бири Робер Шуман номи билан чамбарчас боғлиқ.
Рим папаси Шуман Европани халқаро ҳуқуққа ҳурмат асосига қурилган, қуролли тўқнашувлардан кўра мулоқотни афзал биладиган қитъа сифатида тасаввур қилганини эслатган.
epd агентлиги маълумотига кўра, Католик черкови Шуманни мубораклар сафига киритиш — беатификация жараёнини олиб бормоқда. Агентлик Рим папасининг Европа ҳақидаги нутқини Франция сафаридаги энг муҳим сиёсий чиқиш сифатида баҳолаган.
«Тинчлик учун айрим позициялардан воз кечиш зарур»
Лев XIV Франция президенти Эммануэл Макрон иштирокидаги чиқишида европаликларни тинчлик ўрнатиш йўлида ҳаракат қилишга чақирган.
«Музокараларда жасорат кўрсатиш ва олий неъмат — тинчлик йўлида айрим позициялардан воз кечишга тайёр бўлиш зарур», — деган понтифик.
AFP агентлиги хабарига кўра, у Украинадаги урушни бевосита тилга олмаган. Бироқ «ҳар куни беҳисоб тинч аҳоли вакилларининг ҳаётига зомин бўлаётган маъносиз қиргин»дан афсус билдирган.
Францияга тўрт кунлик сафар
Ташриф давомида Лев XIV Парижда Эммануэл Макрон билан учрашган ва ЮНЕСКО қароргоҳига борган. Шунингдек, Париж Биби Марям соборида ибодат қилиб, «Стад де Франс» стадионида қарийб 80 минг нафар ёш билан учрашган.
Кейинроқ Рим папаси Париждаги Келишув майдонида диний маросим ўтказган. Елисей майдонлари бўйлаб махсус папамобилда ҳаракатланган понтификни қутлаш учун қарийб 800 минг киши келган.
