Сан-Францискода «инсоннинг робот-терминаторга қарши илк жанги” деб номланган воқеа содир бўлди.
Блогер Фрэнки Лапенна бўйи 183 сантиметрли одамсимон роботга қарши жанг қилди. Тармоқларда тарқалган видеода робот блогерни бир зарба билан йиқитгани акс этган. Хабар қилинишича, бир нечта оғир зарбаларни қабул қилган блогернинг қўли синган.
Ушбу жанг REK (Robot Entertainment Kombat) компанияси томонидан ташкил этилди. Компания роботлар жангини кўнгилочар спорт тури сифатида ривожлантириш билан шуғулланади.
Ташқи кўриниши машҳур “Терминатор”ни эслатувчи EngineAI T800 деб номланган ушбу роботнинг нархи 100 000 доллар атрофида. Қайд этилишича, REK жангларида иштирок этувчи роботлар автоном эмас, улар оператор томонидан бошқарилади.
