Оқ уйдаги учрашувлар
АҚШ президенти Доналд Трамп Оқ уйда Украина президенти Володимир Зеленский ва Исроил бош вазири Бинямин Нетаняҳу билан алоҳида учрашувлар ўтказди. Оқ уй матбуот котиби Каролин Левит ҳар икки учрашувни ҳам «ижобий ва самарали» деб таърифлади.
Зеленский Трамп билан Россия иштирокидаги тинчлик музокараларини қайта тиклаш ва Украинага «Patriot» ракеталарини ишлаб чиқариш имконини берувчи келишувни муҳокама қилди. Шу билан бирга Россия энергетикасига қарши санкцияларни илгари сурувчи АҚШнинг янги қонун лойиҳасини олқишлади.
«Биз дипломатия ҳақида ҳам гаплашдик, дипломатик жараённи фаоллаштириш муҳим», деди Зеленский Россия билан тўхтаб қолган тинчлик музокараларига ишора қилиб.
Шунингдек, Зеленский дунёдаги энг йирик қурол ишлаб чиқарувчи — Lockhead Martin раҳбарияти билан ҳам учрашганини айтди. Унинг сўзларига кўра, ишчи гуруҳлар «Patriot»ларни «иложи борича тезроқ қўшма ишлаб чиқаришга ўтиш» ечимлари устида ишламоқда.
Исроил бош вазири эса Трамп билан учрашувини «энг яхши суҳбатларидан бири» деб атади.
Трамп билан муносабатлари гоҳ совуқ, гоҳ илиқ бўлиб келган Нетаняҳу эса 27 октябр куни бўлиб ўтадиган сайловлар олдидан ўзининг қайта сайланиш кампанияси учун унинг қўллаб-қувватлашига эришмоқчи.
Шунингдек, улар Трамп воситачилигида тузилган Иброҳим келишувларини ҳам муҳокама қилган. Трамп ушбу келишувларга Саудия Арабистонини ҳам қўшмоқчи.
Куннинг иккинчи ярмида ҳар учала етакчи Вашингтон Миллий соборида сенатор Линдси Гремнинг дафн маросимида иштирок этди. Июл ойида юрак хасталигидан тўсатдан вафот этган Грем — Исроилни ҳам, Украинани ҳам қўллаб-қувватлаган. У ўз сиёсий фаолияти бошларида Трампни қоралаб, кейинчалик унинг ашаддий тарафдорига айланган мудофаа соҳасидаги радикал-консерваторлардан эди.
Сўнгги ойларда Грем америкаликлар орасида оммалашмаган Эрон уруши садоқатли ҳимоячисига айланганди. У, шунингдек, Ғазони ер билан яксон қилишни ёқлаб чиққани учун танқидларга учраган.
Японияда кучли зилзила
Сешанба куни Япониянинг жанубий қисмини ларзага келтирган 7,1 магнитудали зилзила содир бўлди. Оқибатда камида 13 киши ҳалок бўлди, минглаб уйлар электр таъминотисиз қолган.
