Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Саудия нефт экспорти хавф остида
Агар Саудия Арабистони Қизил денгизга борувчи асосий қувурини бир неча кун ичида қайта ишга туширмаса, экспорт учун нефт захиралари тугайди. Бу эса глобал таъминотнинг 4 фоизгача қисқаришига олиб келади, деб ёзмоқда Reuters.
Саудия етказиб бериш ҳажмининг янада қисқариши шусиз ҳам глобал ёқилғи нархларини рекорд даражага кўтарган глобал таъминот тақчиллигини ёмонлаштиради.
Жума куни ҳусийларнинг дрон ҳужумлари Саудия Арабистонининг улкан шарқ-ғарб нефт қувурини ёпишга мажбур қилганди. Ҳозирча Ар-Риёд зарар кўлами ёки ушбу йўналиш қанча вақт ишламаслиги ҳақида маълумот бермади.
Манбаларга кўра, зарарни тиклаш беш-олти ҳафтагача давом этиши мумкин. Яна бир расмий эса қувур тезроқ таъмирланиши ва бу вақтда ҳам ёқилғини узатишни қисман тиклаш мумкинлигини айтмоқда.
Қувур ишдан чиққани сабабли, Янбу портида Саудия экспортини атиги беш-етти кун сақлаб қолишга етадиган захира қолган.
Қувурга қилинган ҳужумдан ташқари, ҳусий жангчилари жума куни Қизил денгизнинг бўғоз кириш қисмидаги оролни ҳам эгаллаб олишган.
Ўтган олти ой давомида Арабистон чўллари бўйлаб ўтувчи минг километрдан ортиқ ушбу қувур саудларни — Ҳўрмузнинг ёпилиши таъсиридан асраб қолганди.
Дунёдаги энг йирик экспорт қувуридан кунига тахминан 4 миллион баррел – жаҳон таъминотининг тахминан 4 фоизи ўтади.
«Дизелга зарба берманг»
АҚШ президенти Доналд Трамп Украинани Россиянинг дизел инфратузилмасига зарба беришни тўхтатишга чақирди. Трампга кўра, бу ҳужумлар дунёга «зиён етказаётган» ёқилғи тақчиллигига сабаб бўлмоқда.
Сўнгги ойларда Россиядаги нефт заводларига Украина дронлари тинмай ҳужум қилмоқда. Бу Россияда ёқилғи ишлаб чиқаришни камайтириб, бензин тақчиллигига олиб келди.
«Жаноб Зеленский битта нарсани қилиши керак: у Россиядаги дизел ёқилғисини ишдан чиқаришни тўхтатиши керак», деди Трамп якшанба куни Ирландиядаги ўз оиласига тегишли голф майдонига ташрифи чоғида.
