Киев шаҳри мэри Виталий Кличконинг маълум қилишича, тун давомида шаҳарда бир неча кучли портлашлар содир бўлган. У аҳолини ҳаво ҳужуми хавфи сақланаётгани сабабли бошпаналарни тарк этмасликка чақирган.
Киев шаҳар ҳарбий маъмуриятининг маълумотига кўра, ҳужум оқибатида шаҳарнинг камида беш туманига зарар етган. Энг катта талафот Дарницкий ва Соломенский туманларида қайд этилган.
Соломенский туманида икки киши ҳалок бўлган, саккиз нафар фуқаро, жумладан икки нафар бола жароҳат олган. Манзиллардан бирида беш қаватли турар жой биносининг бир қисми қулаб тушган ва ёнғин келиб чиққан. Яна бир ҳудудда автотураргоҳдаги автомашиналар ёнган. Уч нафар жабрланувчи шифохонага ётқизилган. Қутқарувчилар юқори қаватларда қолиб кетган 35 нафар аҳолини эвакуация қилган ва ёнғинларни бартараф этган.
Дарницкий туманида эса маъмурий бино ҳамда нотураржой объектларидан бирида вайронгарчилик ва ёнғинлар юз берган. Шунингдек, автомашиналар ёниб кетган, яқин атрофдаги уй-жойларга ҳам зарар етган. Ушбу туманда етти киши ҳалок бўлган, 14 нафар фуқаро жароҳат олган. Улар орасида икки нафар бола ҳам бор. Фавқулодда хизматлар ёнғинларни ўчиришга муваффақ бўлган.
Киев вилоятида ҳам Россия ҳужуми оқибатида саноат корхоналаридан бирида ёнғин чиққан. Вилоят ҳарбий маъмурияти маълумотига кўра, ушбу ҳодисада икки киши жароҳат олган.
Ҳозирда қутқарув ва тезкор хизматлар ҳужум оқибатларини бартараф этиш, вайроналарни тозалаш ҳамда жабрланганларга ёрдам кўрсатиш ишларини давом эттирмоқда.
