УЕФА ва ФИФА ўртасидаги қарама-қаршилик авжига чиқмоқда – The Telegraph нашри маълумотига кўра, европаликлар Халқаро футбол федерацияси президенти раҳбари Жанни Инфантинонинг истеъфосини талаб қилмоқда. Улар ушбу мулозимга асл муносабатини яширмаяпти: бир кун олдин Европа футбол ассоциациялари иттифоқи аниқ баёнот берганди.
УЕФА ҳаракатга тайёр
Британиялик журналистларга кўра, УЕФАдагилар Инфантино ўз ихтиёри билан истеъфога чиқишини исташмоқда. Агар 56 ёшли швейцариялик мулозим бу талабдан бош тортадиган бўлса, европаликлар унинг кетишига эришишни ва унга нисбатан ишончсизлик вотуми эълон қилишни режалаштирмоқда.
Регламентга кўра, овоз беришни бошлаш учун 43 та ассоциациянинг қўллаб-қувватлаши етарли, УЕФА эса бу жараёнда тўлиқ таркибда – 55 та миллий федерация билан иштирок этишга тайёр.
Европаликлар бунга параллел равишда бўлажак сайловларда Инфантинога қарши турадиган мухолиф номзод қидирмоқда. Ҳозирча иккита вариант бор: КОНКАКАФ раҳбари Виктор Монталяни ва Осиё футбол конфедерацияси президенти Салмон ибн Иброҳим Ал-Халифа. Учинчи эҳтимолий иштирокчи – «ПСЖ» бош директори Носир Ал-Ҳилайфий – аллақачон сайловда иштирок этмаслигини маълум қилди. Номзодлар рўйхати ноябрга қадар шакллантирилиши керак, сайлов эса 2027 йил баҳорида ўтказилади.
«ФИФАга ишончни қайтариш энди бошланмоқда»
Аслида The Telegraph инсайдларининг кўп қисми янгилик эмас. УЕФА анчадан буён Инфантино билан ошкора ёвлашмоқда – 1 август куни иттифоқ сайтида шов-шувли пресс-релиз эълон қилинди, унда европаликлар функционернинг «футболни хусусийлаштириш»га уринишини очиқчасига фош қилишган.
«Инфантино 2016 йилда ФИФАга аъзо ассоциацияларга президентлик сайловларида унга ишонч билдириш ва қўллаб-қувватлашни сўраб мурожаат қилганида, шундай деганди: «Албатта, биз шаффоф бўлишимиз керак. Мен УЕФАдаги сўнгги 15 йиллик фаолиятим давомида ушбу тамойилга амал қилдим. Буни ҳар куни ФИФАда ҳам қилиш керак»... Лекин у ваъдасининг устидан чиқмади. У ўтказишга уринган ноаниқ, парда ортидаги келишув – исталган нарса бўлиши мумкин, лекин шаффоф эмаслиги аниқ», – дейилади баёнотда.
Жанни молия ишларини етарлича олиб бора олмагани учун ҳам танқид қилинган.
«Захирада 5 миллиард доллардан ортиқ маблағ борлигига қарамай, у ассоциациялар пулларини ўйин манфаати учун ишлатмади. УЕФА зудлик билан бутун дунё бўйлаб ва футболнинг барча соҳаларидаги ҳамкорлар ва манфаатдор томонлар билан мавжуд FIFA Forward дастури орқали ресурсларни тақсимлашнинг янги усулини таклиф қилиш учун иш бошлайди.
