АҚШ-Эрон уруши
АҚШ президенти Доналд Трамп душанба куни Эрон билан музокараларнинг янги босқичи бўлиб ўтишини маълум қилди.
Аввалроқ Трамп Эрон ва Яқин Шарқнинг бошқа мамлакатлари бўғозни «зудлик билан» очишга олиб келадиган келишувни якунлаш учун вақт сўраганини, аммо Теҳрон «тезда КEЛИШУВГА эришиши» кераклигини ёзганди.
Трамп якшанба куни журналистларга музокаралар душанба куни тушдан кейин бошланишини айтди. Бироқ у учрашув қаерда бўлиб ўтиши ва унда кимлар иштирок этиши ҳақида маълумот бермади.
Эронга келишувга эришиш учун охирги муддат қўйилганми деган саволга Трамп жавоб беришдан бош тортди.
«Келишувга эришишни афзал кўраманми? Мен одамларни ўлдириш ниятида эмасман, чунки [урушда] кўплаб одамлар ўлади. Биз эса буни хоҳламаймиз», деб жавоб берди Трамп.
Трамп феврал ойи охирида Исроил билан биргаликда бошлаган Эронга қарши урушни кучайтириш билан бир неча бор таҳдид қилган. Сўнгги кунлардаги кескинлик ва ҳужумлар Форс кўрфазидан Қизил денгизгача, ҳатто Мисрдаги Ўрта Ер денгизи иншоотигача кенгайиб кетганди.
Якшанба куни Эрон ташқи ишлар вазири Аббос Арақчи дипломатик саъй-ҳаракатларни муҳокама қилиш учун ўзининг саудиялик ҳамкасби шаҳзода Файсал ва Покистон армияси раҳбари Асим Мунир билан мулоқот қилган.
Эроннинг расмий ахборот агентлиги Теҳрон ва Омон ўртасида Ҳўрмуз бўғози бўйича музокаралар якуний босқичда эканини хабар қилди.
Исроил энергетика вазири, Нетаняҳунинг хавфсизлик кенгаши аъзоси Эли Коэн эса минтақада содир бўлаётган барча жараёнлар бўйича АҚШ билан хавфсизлик ва разведка мувофиқлашуви мавжудлигини таъкидлади. Унинг таъкидлашича, келишув бўлган тақдирда ҳам, Эрон шартларга риоя қилмаса, Исроил «шу ерда бўлади».
Москвада теракт ва уруш ҳаракатлари
1 август куни кечқурун Москвада содир этилган теракт оқибатида камида уч киши ҳалок бўлди ва 21 киши жароҳатланди. Портлаш Москванинг Кудринский майдонидаги осмонўпар бинода жойлашган италян ресторани яқинида юз берган.
Россия Миллий аксилтеррор қўмитасининг билдиришича, қўлбола портловчи қурилма кўтариб олган номаълум аёл ресторанга киришга уринган, бироқ хавфсизлик ходими томонидан тўхтатиб қолинган. Шундан сўнг юз берган портлаш оқибатида аёл, қоровул ва рестораннинг бир мижози воқеа жойида ҳалок бўлган.
Маҳаллий ОАВга кўра, шифохонага етказилган икки киши ҳам жароҳатлари оқибатида вафот этган, натижада қурбонлар сони беш кишига етди. Яна олти кишининг аҳволи ҳамон оғирлигича қолмоқда.
Москва мэри Сергей Собянин якшанба куни қурбонларнинг оила аъзоларига ҳамдардлик билдирди ва айбдорлар жазоланишини таъкидлади. Расмийлар ҳалок бўлганлар, жароҳатланганлар ёки гумондорларнинг исм-шарифларини эълон қилмади.
Урушни ёритувчи каналлар маълумотларига кўра, ҳужум нишони — Россия Ҳаво-космик кучлари бош қўмондони, генерал-полковник Александр Чайко бўлган бўлиши мумкин. Бундан ташқари, ресторанда Россия ФХХнинг юқори лавозимли расмийлари ва бошқа мансабдорлар ҳам бўлган.
«Коммерсант» газетаси бомба кўтариб келган аёл бу ҳақда умуман билмаган бўлиши ва портловчи қурилма масофадан ҳаракатга келтирилгани эҳтимолини илгари сурди.
Россия ҳукумати Киевни айблаб келаётган қатор суиқасдлардан сўнг, бу йил юқори мартабали ҳарбий амалдорларни яхшироқ ҳимоя қилишга ваъда берганди. Россиялик ҳарбий блогерлар ҳеч қандай далил келтирмасдан, бу ҳужумда ҳам Украинани айблади. Расмий Киев воқеа юзасидан изоҳ бермади.
Дам олиш кунлари Россия-Украина ўртасида ҳарбий ҳаракатлар ҳам давом этди. Якшанба куни Россия ҳудудларига қилинган Украинанинг юзлаб дронлари ҳужумлари оқибатида камида саккиз киши ҳалок бўлди.
Самарада ҳам WB омборлари ёндирилди. Шунингдек, Украина кучлари Саратов ва Калугадаги нефт заводига, Энгелсдаги авиабазасига ҳужум қилган.
Ўз навбатида, Россия кучлари Украинанинг Николаев портидаги инфратузилмаларга ва Қора денгизда ҳарбий таъминот олиб кетаётган кемага зарба берган.
Марокашлик мигрантлар қайтарилмоқда
Ўтган ҳафтада Марокашдан Испаниянинг Сеута анклавига оммавий равишда ёпирилиб кирган муҳожирлар орасида қурбонлар сони камида 72 кишига етди. Расмийларнинг маълум қилишича, Шимолий Африка қирғоқлари бўйлаб яна беш кишининг жасади топилган.
Испания ҳукуматининг Сеутадаги вакили Мигел Пересга кўра, яна 1000 дан ортиқ кишига тиббий хизмат кўрсатилган. Анклавдаги вазият сезиларли даражада яхшиланган, аммо одатий ҳаёт тарзини тўлиқ тиклаш учун ҳали кўп иш қилиниши керак, деди расмий.
Айрим муҳожирлар тўлқинларни қайтариш учун қўйилган тўсиқлар ва чегара панжарасига чиқишга уриниш пайтида чўкиб кетган, бошқалари эса тиқилинчда босиб қолинган. Уларнинг кўпчилиги иқтисодий қийинчиликлар туфайли ҳамда ижтимоий тармоқлардаги миш-мишларга ишониб миграцияга қарор қилган.
Испания полиция ва армия патрулларини кучайтирди. Шанба куни Сеута қирғоқлари яқинида 500 метрлик сузувчи тўсиқ ўрнатилди.
Европа Иттифоқининг Африка билан қуруқликдаги чегарасида пайшанба куни бошланган мисли кўрилмаган оқим давомида 50 000 дан ортиқ одам Сеутага ўтди. Бу бутун Европа Иттифоқи бўйлаб хавотир уйғотди. Испания расмийларига кўра, 2 кун ичида 48 000 дан ортиқ муҳожир Марокашга қайтарилган ва дам олиш кунларида бу рақам яна ошган.
Марокаш ички ишлар вазирлиги муҳожирларнинг бундай ёпирилиб келишига — одам савдоси тармоқлари ва «муҳожирларни зудлик билан ортга қайтаришни тақиқловчи Испания қарори»нинг нотўғри талқин қилинишини сабаб қилиб кўрсатди. Шунингдек, Марокаш ноқонуний миграцияга қарши курашиш ниятида қатъий экани таъкидланиб, миграцияни бошқариш масъулиятини биргаликда кўтаришга чақирилди.
Фожиали дам олиш кунлари
Август ойининг дастлабки 2 куни — дам олиш кунлари дунё бўйлаб жуда нотинч ўтди. Бир қанча мамлакатларда ҳалокатлар ва фожиали ҳодисалар қайд этилди.
Хусусан, Перуда 1 август куни Grand Caravan самолёти қулаб тушди. Оқибатда бортдаги барча 13 киши ҳалок бўлди. Қурбонларнинг 11 нафари европалик сайёҳлар ва 2 нафари маҳаллий учувчилар бўлган.
Самолёт Перунинг машҳур археологик зонаси узра сайёҳлик парвозини амалга ошираётган бўлган. Алоқа узилишидан олдин экипаж аъзолари механик носозлик ҳақида хабар беришга улгурган, самолёт далага қулаб, ёниб кетган.
2 август куни Покистоннинг Сват водийсидаги сиёсий намойиш вақтида теракт содир бўлди. Ҳудудий полиция маҳкамаси ёнида юз берган худкушлик портлашида 14 киши ҳалок бўлди ва 20 дан ортиқ одам яраланди.
Маҳаллий ОАВларга кўра, худкуш террорчи полиция текширувидан қочиш учун ўзини намойишчилар ичида портлатган. Ҳужум учун масъулиятни «Таҳрики Толибони Покистон» гуруҳи ўз бўйнига олди.
2 август куни Индонезиянинг Мадура ороли яқинида паромда чиққан ёнғин оқибатида эса 5 киши ҳалок бўлди, 41 киши бедарак йўқолди. Бортда жами 271 йўловчи ва экипаж аъзолари бўлган, уларнинг 225 нафари қутқариб олинди.
Паром Макассар томон кетаётганида олов ичида қолган. Кўплаб йўловчилар ёнғиндан қочиш учун ўзларини денгизга отган. Ҳозирда ёнғиннинг келиб чиқиш сабаблари юзасидан суриштирув олиб борилмоқда.
Якшанба куни яна бир фожиа – ўрмон ёнғинлари билан курашаётган Грецияда юз берди. Афина яқинидаги ёнғинларни ўчиришда қатнашаётган икки вертолёт ҳавода тўқнашиб кетди. Оқибатда 2 киши ҳалок бўлди — бири даниялик учувчи, иккинчиси грециялик координатор. Иккинчи вертолётдагилар омон қолган.
Маълум қилинишича, операция давомида Bell русумли икки вертолёт ҳавода бир-бирига жуда яқин келиб қолган, натижада уларнинг парраклари тўқнашиб кетган.
