Спортчи 31 июл куни Швециянинг Касеберга қишлоғидан йўлга чиққан ва 2 август куни кечқурун Полшанинг Дзивнув шаҳри соҳилига етиб келган. Бу унинг Болтиқ денгизини кесиб ўтишга бўлган бешинчи уриниши бўлиб, аввалги барча ҳаракатлари муваффақиятсиз якунланган эди.
Кубковский икки суткадан ортиқ вақт давомида танаффус қилмасдан сузган. У кучли тўлқинлар, шамол ва совуқ сув шароитига қарамай, бутун масофани босиб ўтган ҳамда қоидаларга мувофиқ ҳамроҳлик қилган қайиққа бирор марта ҳам тегмаган.
Озиқ-овқат ва ичимликлар унга ҳамроҳлик қилган қайиқдан махсус узун таёқлар орқали узатиб турилган. Спортчининг жамоаси маълум қилишича, иккинчи кечада кучли чарчоқ туфайли унда галлюцинациялар кузатилган. Шунга қарамай, у масофани тўлиқ якунлашга муваффақ бўлган.
Соҳилга етиб келганида Кубковскийни кўплаб мухлислар кутиб олди. Унинг бу натижаси Болтиқ денгизини мазкур йўналиш бўйича сузиб кесиб ўтган илк инсон сифатида тарихга кирди.
Ultra Baltic Swim деб номланган экстремал сузиш акцияси нафақат спорт ютуғи, балки хайрия мақсадларини ҳам кўзлаган. Тадбир давомида саратон касаллигига қарши курашувчи Cancer Fighters жамғармаси учун қарийб 185 минг евро маблағ йиғилди.
