26 октябр куни Лондонда узоқ кутилган «Олтин тўп» топшириш маросими бўлиб ўтди.
Кўпчилик бу мукофотга скептик ёндашадиган бўлиб қолган – унинг топширилиши мезонлари танқид қилинади ва сўнгги йиллардаги ғолиблар бўйича эътирозлар билдирилган. Аммо ҳар йили миллионлаб мухлислар мавсумнинг энг яхши футболчисига бериладиган бу мукофотни ким олишини интиқиб кутишади. Ўтган мавсум учун мукофот ҳақли равишда «Бавария» ва Англия миллий жамоаси ҳужумчиси Ҳарри Кейнга берилди.
Кейн Майкл Оуэн давридан буён (2001 йил) «Олтин тўп» қўлга киритган илк инглиз футболчиси бўлди. Бундан ташқари, ушбу мукофотни ўтмишда Стэнли Мэттюз, Бобби Чарлтон ва Кевин Киган каби инглизлар ҳам қўлга киритган.
Бу сафарги пойга жуда қизиқ кечди. Реал номзодлар орасида ғолибдан ташқари Ламин Ямал, Килиан Мбаппе ва Лионел Мессининг номлари ҳам тилга олинётганди.
Футбол ҳамжамиятида энг нуфузли индивидуал совринни ким олиши кераклиги борасидаги баҳслар бир неча ойдан буён давом этаётганди. Ҳар кимнинг ўз аргументлари бор. Аммо амалда Кейн бу мукофотга энг муносиб номзод эди.
Ҳа, у Германиядаги барча совринларни ўзиники қилган бўлса-да, халқаро майдонларда катта ғалабаларга эриша олмади: «Бавария» Чемпионлар лигасида яримфиналда тўхтади, Англия миллий жамоаси эса ЖЧ-2026 финалига чиқа олмади. Лекин мукофотни топшириш мезонларида биринчи навбатда футболчининг индивидуал иштирокига баҳо берилиши кераклиги кўрсатилган. Агар фақат жамоавий ютуқларга қаралганида бу сафарги мукофотни Фабиан Руисга беришга тўғри келган бўларди.
Кейн амалда ажойиб мавсум ўтказди ва икки жиҳат эътиборга молик.
Биринчиси – мухлисларга ташқаридан кўринадиган жиҳат: статистика. клуб ва миллий жамоа сафидаги 73 гол – XXI асрда Европа клублари футболчилари орасидаги энг яхши иккинчи натижа. Ундан кўпроқ голни фақат Месси 2011/12 йиллар мавсумида урганди. Таққослаш учун, Криштиану Роналдунинг фаолиятида бирор марта бу қадар сермаҳсул мавсум бўлмаган ва у «Олтин тўп»нинг беш карра ғолиби саналади.
Оддий мухлисларга кўринмайдиган бошқа бир жиҳат ҳам бор: гап фақат голларда эмас. Кейн футболда инқилоб қилди ва ҳужумчи қандай ўйнаши кераклиги борасидаги тасаввурларни ўзгартириб юборди. Гап унинг анча ортга қайтиб, «алдамчи тўққизлик» сифатида ҳаракат қилишидагина эмас. У майдоннинг исталган нуқтасида пайдо бўлиши мумкин. У таянч зонасига келади ва тўпни олиб чиқишда ёрдам беради. Рақибнинг қарши ҳужумлари йўлини тўсиш учун қанот ҳимоячисига айланади.
