Германиянинг Саксония федерал ерида жойлашган Лейпциг–Галле аэропортида портловчи модда билан жиҳозланган дрон топилгани мамлакат хавфсизлиги учун жиддий хавф сифатида баҳоланмоқда. Бу ҳақда Германия ички ишлар вазири Александр Добриндт маълум қилди.
Унинг таъкидлашича, ҳодиса тасодифий эмас ва уни амалга оширганлар юқори техник билим ҳамда портловчи моддалар билан ишлаш тажрибасига эга бўлган. Вазирнинг фикрича, бу ҳаваскорлар эмас, балки профессионаллар томонидан ташкил этилган гибрид ҳужум бўлиши мумкин.
Добриндт эҳтимолий айбдорларнинг номини очиқламаган. Бироқ у ҳодиса ортида хорижий давлатлар ҳам туриши мумкинлигини айтди ва бу ҳолат тергов жараёнида аниқланишини билдирди. Вазир мазкур воқеа муносабати билан таътилни тўхтатиб, бир нечта хавфсизлик идоралари раҳбарлари иштирокида йиғилиш ўтказган.
Полиция маълумотига кўра, 5 августга ўтар кечаси Лейпциг–Галле аэропортида украинанинг Антонов-124 (Ан-124) юк самолётидан бир неча метр узоқликда шубҳали буюм топилган. Рентген текшируви уни детонатор ўрнатилган портловчи моддали кичик квадрокоптер эканини кўрсатган. Кейинчалик дрон масофадан бошқариладиган робот ёрдамида хавфсиз тарзда зарарсизлантирилган.
Ҳодиса туфайли аэропорт фаолияти вақтинча тўхтатилган ва бир нечта рейслар бошқа аэропортларга йўналтирилган. Шу вақтда Лейпцигга қўна олмаган DHL компаниясининг юк самолёти қайта баландликка кўтарилаётганда номаълум объект билан тўқнашган. Самолёт парвозни давом эттириб, Ҳанновер аэропортига қўнган. Кейинчалик унинг корпусида енгил шикастланишлар аниқланган. Ҳодиса оқибатида жабрланганлар бўлмаган.
Лейпциг–Галле аэропорти Украинага ғарб давлатлари ҳарбий ёрдамини етказиб беришда муҳим логистика марказларидан бири ҳисобланади. Шунингдек, бу ерда DHL компаниясининг йирик логистика ҳабларидан бири ҳам жойлашган.
