Ҳусийлар ҳужуми
Пайшанба куни Ямандаги ҳусийларнинг Саудия Арабистони жанубига қилган ҳужуми оқибатида 11 нафар тинч аҳоли вакили жароҳат олди. Бу ҳақда Саудия бошчилигидаги ҳарбий коалиция матбуот котиби генерал майор Турки ал-Маликий маълум қилди.
Унинг айтишича, жанубий Нажрон провинциясидаги ҳужумда Саудиянинг етти нафар, шунингдек, Яман, Миср ва Покистон фуқаролари жароҳатланган. Жабрланганлар орасида иккинчи даражали куйиш жароҳатини олган 4 ёшли бола ҳам бор.
Маликий ҳусийларни тинч аҳоли ҳудудларини тартибсиз ўққа тутишда айблади ва коалиция тинч аҳолини ҳимоя қилиш учун чораларни кўришини таъкидлади.
Шунингдек, ҳусийлар пайшанба куни Мариб ва Ҳадрамаут провинцияларида ўзлари Саудия Арабистони ҳарбий қисмлари деб атаган жойларга ҳужум уюштириб, Яман ҳукуматининг 30 дан ортиқ аскарини ўлдирган.
АҚШ ва Исроилнинг Эрон билан беш ойдан бери давом этаётган уруши Саудия Арабистонининг хавфсизлик борасидаги ҳисоб-китобларини тобора мураккаблаштирмоқда.
Чунки ҳусийларнинг ҳаракатлари, масалан, Саудия нефт экспортини тўхтатиб қўйган Қизил денгиз қамали — минтақавий хавфларни ошириб юборди.
Саудиялик амалдорнинг Reutersʼга айтишича, разведка хизматлари — ҳусийлар ва Ироқ қуролли гуруҳлари тез орада қиролликнинг энергия инфратузилмаси, портлар ва аэропортларга мувофиқлаштирилган ҳужумлар уюштириши мумкинлигини аниқлаган.
Шу боис Ар-Риёд асосий иттифоқчилари билан хавфсизлик соҳасидаги ҳамкорликни чуқурлаштиришга интилмоқда. Хусусан, Туркия, Саудия Арабистони ва Покистон жума куни подшоҳликда мудофаа бўйича келишув имзолаши кутилмоқда. Келишув тафсилотлари ҳозирча маълум қилинмаган. Амалдорнинг айтишича, режалаштирилган ҳужумлар ушбу дипломатияни йўққа чиқаришга қаратилган бўлиши мумкин.
Трампдан миграцияга қарши янги фармонлар
Президент Доналд Трамп пайшанба куни АҚШда туғилиш бўйича фуқароликни чекловчи иккита янги фармонни имзолади. Шу билан бирга у Олий суднинг фуқаролик бўйича аввалги қарорини «жуда ачинарли» деб атади.
Икки ой олдин Олий суд Трампнинг аввалги уринишларини рад қилганди.
Туғилиш бўйича фуқаролик олиш ҳуқуқи АҚШ Конституциясининг 14-тузатишида мустаҳкамланган. Қоида чет эл дипломатлари ёки душман кучлари аъзоларининг фарзандлари каби жуда камдан кам истиснолардан ташқари, АҚШда туғилган чақалоқлар учун фуқароликни кафолатлайди.
Трамп имзолаган фармонлардан бири «хорижий террористик ташкилотлар» аъзоларининг, шунингдек, «хорижий ҳукуматлар номидан лоббизм билан шуғулланувчи одамлар»нинг фарзандларига туғилиш бўйича фуқаролик беришни рад этади.
Иккинчи фармон Трамп «ҳомиладорлик туризми» деб атаган ҳолатга қаратилган. Бу ибора АҚШ фуқаролигига эга бўлишлари учун мамлакат ҳудудида фарзанд кўриш мақсадида виза олиб, АҚШга саёҳат қиладиганларга нисбатан ишлатилади.
Расмийга кўра, «ушбу амалиёт мазкур фармон имзоланган кундан эътиборан тақиқланади». Трампни қўллайдиган Иммиграцияни ўрганиш маркази маълумотларига кўра, 2016-2017 йилларда 20 мингдан 25 минггача оналар шундай қилишган.
Оқ уйнинг таъкидлашича, янги фармонлар Олий суд ҳукмидаги чекловлар доирасига кирмайди. Шунга қарамай, мазкур фармонлар юзасидан ҳам судга шикоят қилиниши кутилмоқда.
Кореяда экстремал иссиқ
Шу кунларда Жанубий Кореядаги жазирама иссиқ Сеулда ўзининг энг юқори чўққисига чиқиши кутилмоқда. Пойтахтда ҳаво ҳарорати 37-39 даража Целсийга етган. Ушбу экстремал об-ҳаво шароити оқибатида шу кунгача 20 дан ортиқ одам ҳалок бўлгани айтилмоқда.
Аслида 39-40 даража иссиқ марказий осиёликлар учун унчалик ваҳимали кўринмаслиги мумкин. Лекин ёз фаслида Тинч океанидан келадиган нам шамоллар туфайли Корея иқлими худди «сауна» каби жуда дим бўлиб қолади.
«Биз илгари ҳеч қачон бошдан кечирмаган кўламдаги жазирама иссиқ кундан кунга давом этмоқда. Бир пайтлар фақатгина хорижий янгиликлар хабарларида кўрилган жазирама шароитлари энди бизнинг ҳақиқатимизга айланди», деди президент Ли Чже Мён.
Ли вазирликлар ва маҳаллий ҳокимият органларига жазирама пасайгунига қадар барча мавжуд ходимлар ва ресурсларни сафарбар этишни буюрди.
Корея Метеорология бошқармаси маълумотларига кўра, айрим маҳаллаларда тунги ҳарорат деярли 30 даражадан пастга тушмаган. ОАВ эса дарёлар бўйидан, савдо марказлари ва кондиционер билан жиҳозланган бошқа жойлардан паноҳ излаётган оломонни намойиш этди.
Метеорологларнинг фикрича, Жанубий Кореяга тўғридан тўғри хавф туғдирмаслигига қарамай, «Делфин» тайфуни бу каби куйдирувчи ҳаво шароитларига ўз ҳиссасини қўшаётган бўлиши мумкин.
Украина армиясидаги кўнгиллилар
Ҳозирги вақтда Украина армиясида дунёнинг камида 72 давлатидан келган 16 мингга яқин хорижий кўнгиллилар жанг қилмоқда. Уларнинг қарийб 40 фоизини Лотин Америкаси мамлакатлари фуқаролари ташкил қилади. Бу ҳақда Украина ҳарбий омбудсмани Олга Решетилова маълум қилди.
Ҳарбий омбудсман офиси ўз ишини бошлаган 2026 йил 27 январдан бери хорижий кўнгиллилар, уларнинг оила аъзолари ва ваколатли шахсларидан 300 дан ортиқ мурожаат келиб тушган. Расмийнинг таъкидлашича, мурожаатларнинг аксарияти молиявий ва моддий таъминотга, хусусан, қўшимча ҳақ ва бир марталик пул ёрдамини тўлашга тааллуқли бўлган.
Омбудсман офисида хорижий фуқаролар орасидаги ҳарбий хизматчиларнинг «хизматни бошлаши ва ўташидан тортиб, то бўшатиш, ватанига қайтишгача бўлган» муаммолари билан шуғулланувчи махсус гуруҳ тузилган.
Халқаро тадқиқот гуруҳларига кўра, Россия армиясида эса 44 мамлакатдан келган 20 мингдан ортиқ аскар жанг қилмоқда. Уларнинг аксарияти Марказий Осиё, Ҳиндистон ва Африка давлатларининг фуқаролари ҳисобланади.
