Оқ уй матбуот котиби Кэролайн Ливитт 12 август куни X ижтимоий тармоғида ўз лавозимини тарк этишга қарор қилганини эълон қилди. У бу қарорни ўзи учун бир вақтнинг ўзида ҳам оғир, ҳам тўғри қарор сифатида таърифлаган.
Ливиттнинг айтишича, унинг лавозимдан кетишига икки нафар ёш фарзандига кўпроқ вақт ва эътибор ажратиш истаги сабаб бўлган.
Associated Press маълумотига кўра, Ливитт яқинда иккинчи фарзанди туғилиши муносабати билан олган қисқа таътилдан сўнг ишга қайтган эди. Унинг Вивиана исмли қизи май ойида туғилган. Шунингдек, унинг икки ёшли ўғли ҳам бор.
Ливитт Оқ уйга ишга қайтганидан кейин матбуот котиби вазифаси талаб қиладиган вақт, куч ва эътиборни ишга бағишлаш билан бир пайтда икки нафар кичик фарзанди учун ўзи истаган даражадаги она бўла олмаслигини ҳис қилганини ёзган.
У, шунингдек, Доналд Трампга билдирилган ишонч учун миннатдорлик билдириб, АҚШ президенти номидан жамоатчилик олдида сўзлаш имкониятини ўзига берилган «алоҳида ишонч» деб атаган.
Трамп Ливиттнинг кетишини тасдиқлади
Доналд Трамп Truth Social ижтимоий тармоғида Ливитт август ойи охирида Оқ уй матбуот котиби лавозимини тарк этишини маълум қилди.
АҚШ президенти унинг матбуот котиби сифатидаги фаолияти учун миннатдорлик билдириб, Ливиттни Оқ уйдаги «ҳақиқий етакчи» деб атаган.
Трампнинг билдиришича, Ливитт лавозимидан кетганидан кейин ҳам сиёсий майдонда фаол бўлиб қолиши кутилмоқда. Президент уни келгусида ўзининг асосий ташқи маслаҳатчиларидан бири ва Республика партиясида таъсирли шахс бўлишини айтган.
Бироқ Трамп Оқ уйнинг янги матбуот котиби ким бўлиши ҳақида маълумот бермаган.
Оқ уй тарихидаги энг ёш матбуот котиби
Ҳозирда 28 ёшда бўлган Кэролайн Ливитт АҚШ тарихида Оқ уй матбуот котиби лавозимини эгаллаган энг ёш шахс ҳисобланади.
У Доналд Трампнинг биринчи президентлик даврида ҳам Оқ уйда ишлаган. Ливитт 2020 йил июн ойидан Оқ уй матбуот котиби ёрдамчиси лавозимида фаолият юритган.
Кейинчалик у Трампнинг 2024 йилги президентлик сайлови кампаниясида матбуот котиби вазифасини бажарган.
Ливитт Трамп тарафдорларининг MAGA — «Американи яна буюк қиламиз» ҳаракатининг энг таниқли ва фаол вакилларидан бири сифатида ҳам танилган.
