АҚШ давлат департаменти 175 минг кишининг визалари бекор қилинганини эълон қилди. Маълум бўлишича, Чарли Кирк ўлимидан хурсанд бўлганлар, туғуруқ ортидан фуқароликка интилганлар, жинсий зўравонлар ҳамда гиёҳвандлар визаси бекор қилиб юборилган. Бундан ташқари, депортацияси кутилаётган одамлар ҳам огоҳлантирилди.
Давлат департаментининг матбуотга маълум қилишича, виза шартларини бузган, жиноят содир этган, АҚШ фуқароларига нисбатан зўравонликни тарғиб қилган, америкаликларни алдаган, иммиграция тизимини суиистеъмол қилган ёки миллий хавфсизликка таҳдид туғдирган 175 мингдан ортиқ хорижликнинг визаси бекор қилиб юборилган.
Бекор қилинган визаларнинг аксарияти ҳуқуқни муҳофаза қилувчи органлар билан боғлиқ ҳолатлар туфайли қайтариб олинган. Бунда тан жароҳати етказиш, маст ҳолда автомобил бошқариш, ўғрилик ва гиёҳвандлик билан боғлиқ жиноятлар асосий сабаблар бўлган. Шунингдек, эҳтиётсиз ва хавфли ҳайдаш, жинсий зўравонлик, болаларга нисбатан зўравонлик, фирибгарлик, маблағларни ўзлаштириш ва бошқа турдаги жиноятлар учун ҳам кўплаб визалар бекор қилинган.
Давлат департаментига кўра, бу қарорлар доимий текширув ва мониторинг ишлари натижасида қабул қилинган. Мазкур тизим виза эгалари АҚШ қонунлари ва виза шартларига риоя қилаётганини назорат қилишга қаратилган. Қуйидаги ҳолатларда ҳам визалар бекор қилинган:
- Руҳий ногиронлиги бўлган шахсни ҳам ўз ичига олган зўрлаш ва жинсий тажовуз айбловлари билан жавобгарликка тортилган хорижлик;
- Одам ўғирлаш, одам савдоси ва вояга етмаган шахсни жинсий эксплуатация қилишда айбланган хорижлик;
- Жамоат тартибини бузиш, полицияга зўравонлик билан қаршилик кўрсатиш, маст ҳолда автомобил бошқариш ва оилавий зўравонлик учун қўлга олинган хорижлик;
- Шимолий Африкадаги АҚШ элчихоналаридан бири АҚШ ҳудудида фарзанд туғиб, болага Америка фуқаролигини олиш мақсадида келган 100 дан ортиқ “туғуруқ туризми” иштирокчиларининг визаларини бекор қилган;
- Болага нисбатан жинсий зўравонлик ва оғир жинсий жиноятларда айбланган хорижлик;
- Болалар иштирокидаги жинсий эксплуатация материалларини сақлаш бўйича ўндан ортиқ айблов қўйилган хорижлик;
- Машинасида героин топилган ва қондаги алкогол миқдори рухсат этилган меъёрдан уч баравар юқори бўлган ҳолда ушланган хорижлик;
- Жамоатчи ва сиёсий фаол Чарли Киркнинг ўлдирилишини олқишлаган бир нечта хорижлик; Улардан бири “фашистлар ўлганда демократлар шикоят қилмайди” деб ёзган бўлса, бошқаси “у жуда кеч ўлди” деган;
- Тиббий хизматлардан фойдаланишда ёрдам берувчи қонуний бизнес юритаётганини даъво қилган, аммо аслида Медисаид дастури орқали 5 миллион доллардан ортиқ сохта хизматлар учун ҳисоб-фактура расмийлаштирган хорижлик;
- Сохта даромад кўрсаткичлари ва қалбаки ҳужжатлар ёрдамида инвесторларни алдаб, миллионлаб доллар маблағларни ўзлаштирган ҳамда шу ёлғон маълумотлар асосида АҚШ визасини олган хорижлик;
- АҚШга ўқувчиларга дарс бериш учун келиб, кейинчалик улардан бирига жинсий тажовуз қилганликда айбланиб ҳибсга олинган хорижлик.
Давлат котиби Марко Рубио ташқи сиёсат билан боғлиқ асослар бўйича бир қатор хорижликлар депортация қилинишидан огоҳлантирмоқда. Улар орасида қуйидаги тоифадаги одамлар бор:
Куба коммунистик режимининг таъсир операцияларига алоқадор Куба фуқароси;
- Эрон ҳукумати билан алоқалари бўлган Эрон фуқаролари;
- Миннесота губернатори Тим Уолз томонидан афв этилган, жинсий жиноят содир этган Лаос фуқароси;
- АҚШ президентига нисбатан зўравонлик тилаган ва америкаликларни «душманим» деб атаган Кувайт фуқароси бор.
Давлат департаменти таъкидлашича, президент Трамп ва давлат котиби Марко Рубио раҳбарлигида АҚШ хавфсизлигига таҳдид соладиган хорижликларни аниқлаш, текшириш ва уларнинг визаларини бекор қилиш ишлари давом эттирилади.
