Саудия Арабистонида Jeddah Tower осмонўпар биносини қуриш ишлари давом этмоқда. Kingdom Holding Company маълумотига кўра, бино 110 қаватга етиб, қурилишнинг навбатдаги муҳим босқичидан ўтди.

Компаниянинг иккинчи чорак молиявий натижалари бўйича ҳисоботида қайд этилишича, ҳозирга қадар 300 минг куб метрдан ортиқ бетон қуйилган. Бу лойиҳада кўзда тутилган умумий бетон ҳажмининг қарийб 67 фоизига тенг.

Бино фасадини ўрнатиш ишлари ҳам давом этмоқда. Ҳозиргача 3 мингдан ортиқ фасад панели ўрнатилган бўлиб, бу умумий қоплама ишларининг тахминан 11 фоизини ташкил этади.

Шу билан бирга, бинода электр ва сув таъминоти, вентиляция ҳамда бошқа муҳандислик-коммуникация тизимларини ўрнатиш ишлари олиб борилмоқда.

Айни пайтда Jeddah Tower қурилиш майдонида қарийб 6,4 минг киши меҳнат қилмоқда. Лойиҳа амалга оширила бошланганидан буён 16 миллиондан ортиқ киши-соат иш бажарилган. Компания маълумотига кўра, шу вақт давомида иш вақти йўқотилишига олиб келган ҳодисалар ва ўлим билан боғлиқ бахтсиз ҳодисалар қайд этилмаган.

Режага кўра, 2026 йил охирига қадар Jeddah Tower 130 қаватга етиши мумкин. Бу ҳолда у қаватлар сони бўйича Бурж Халифадан ташқари дунёдаги барча осмонўпар бинолардан ўзиб кетиши кутилмоқда.

Jeddah Tower қурилишини 2028 йилда якунлаш режалаштирилган. Лойиҳа тўлиқ амалга оширилгач, иншоотнинг баландлиги бир километрдан ошиши ва у дунёдаги энг баланд бино мақомини қўлга киритиши кутилмоқда.