Жорий йил феврал ойида АҚШ Исроил билан Кўрфазда янги уруш бошланганидан бери Эроннинг денгиз, энергетика ва молия соҳаларига яна қўшимча санкциялар киритди. Ҳўрмузда денгиз қамалини бошлади. Урушнинг бешинчи ойига келиб президент Трамп Эронга яна иқтисодий «қаттиқ зарба беришга» ваъда бермоқда.
АҚШ президенти Доналд Трамп ўтган ҳафтада Эронга иқтисодий жиҳатдан қаттиқ зарба беришга ваъда берди. Бу огоҳлантириш – АҚШ молия вазири Скотт Бессент келаси ҳафтадаёқ Теҳронга нисбатан «илгари ҳеч қачон кўрилмаган» чораларни жорий этишини айтганидан бир кун ўтиб янгради.
Аслида АҚШ, БМТ ва Европа Иттифоқи 1970 йилларнинг охиридан бери Эроннинг ядровий дастури, инсон ҳуқуқларининг бузилиши каби турли сабаблар билан унга нисбатан санкциялар жорий қилган. Эронга нисбатан савдо эмбарголари жорий қилинган ва миллиардлаб долларлик активлари музлатиб қўйилган.
Жорий йил феврал ойида АҚШ Исроил билан Кўрфазда янги уруш бошланганидан бери Эроннинг денгиз, энергетика ва молия соҳаларига яна қўшимча санкциялар киритди. Ҳўрмуз бўғозида денгиз қамалини бошлади.
АҚШ Молия вазирлигининг Хорижий активларни назорат қилиш бошқармаси (OFAC) маълумотларига кўра, Трампнинг иккинчи муддатида давомида агентлик яна 1000дан ортиқ жисмоний шахслар, кемалар ва самолётларга санкциялар киритди.
Сўнгги чоралар – Эроннинг яширин нефт флоти; кемаларни суғурталовчилар; унинг қурол сотиб олишига имкон берувчи субъектлар ҳамда рақамли биржаларга қаратилган. Reutersʼнинг ёзишича, натижада Эрон билан алоқадор кўриладиган юзлаб миллион долларлик криптовалюта музлатиб қўйилган.
Экспертларнинг фикрича, Трамп маъмурияти Эронга босимни ошириш учун қуйидаги вариантларни ҳам синаб кўриши мумкин:
Хитойнинг «чойнак» заводларига қарши санкциялар
«Чойнаклар» номи билан танилган мустақил нефтни қайта ишлаш заводлари – Хитой қайта ишлаш қувватининг чорак қисмини ташкил қилади. Улар паст ва баъзида манфий фойда маржаси билан ишлайди.
Kpler таҳлилий фирмасининг 2025 йилдаги маълумотларига кўра, Хитой Эрон экспорт қиладиган нефтнинг 80 фоиздан ортиғини сотиб олади. Мустақил нефтни қайта ишлаш заводлари эса ушбу савдонинг катта қисмини ўзлаштиради. Натижада улар «иккиламчи чоралар» хавфи остида қолиши мумкин.
