Fox News телеканалига берган телефон интервьюсида Трампдан Эрон ва Ўмоннинг Вашингтон иштирокисиз Ҳўрмуз бўғози устидан назорат ўрнатиш бўйича олиб бораётган музокаралари ҳақида сўралди.
Президент шундай жавоб берди: «Агар Ўмон халақит берса, биз уларни ер тишлатиб бомбардимон қиламиз».
Президент сўзларига кўра, қамал Теҳронга босим ўтказмоқда. У можарони ҳал қилишнинг бирор муддатини айтмади ва шошилмаётганини таъкидлади.
Эрон билан уруш қарийб ярим йилдан бери давом этмоқда ва унинг якунланиш аломатлари кўринмаяпти. Вашингтон ва Теҳрон ўртасидаги мустаҳкам тинчлик бўйича музокаралар боши берк кўчага кириб қолган, вақти-вақти билан авж олаётган тўқнашувлар эса Ҳўрмуз бўғози орқали нефть ва бошқа муҳим товарлар етказиб берилишини издан чиқармоқда.
Можаро нефть ва газ нархининг кескин ошишига олиб келди. Bloomberg нашрининг таъкидлашича, бу ноябрь ойидаги оралиқ сайлов олдидан Трампнинг Республикачилар партияси мавқеига зарба бермоқда.
Аввалроқ Трамп яқин орада Ҳўрмуз бўғозини АҚШ ҳудуди деб эълон қилишга ваъда берган эди. Одатда жаҳон нефть ва суюлтирилган табиий газ етказиб бериш ҳажмининг тахминан 20 фоизи шу бўғоз орқали ўтган. Ҳарбий ҳаракатларнинг чўзилиши истиқболи туфайли Brent маркали нефть нархи бир баррель учун 90 долларга яқинлашди, АҚШда эса бензин нархи бир галлон учун тахминан 4 долларгача қимматлади. Reuters/Ipsos томонидан 2026 йил апрель ойида ўтказилган сўровномага кўра, америкаликларнинг 77 фоизи, жумладан, Республикачилар партияси тарафдорларининг 55 фоизи бензин нархининг юқорилигида айнан Трампни айбламоқда.
